АКШ түркмөн пахтасынын импортуна тыюу салды

АКШ Түркмөнстан пахтасы жана анын кошулмалары бар буюмдарга тыюу салды. Бул тууралуу АКШнын бажы жана чек ара көзөмөлү кызматынын сайтында айтылат. Тиешелүү чечим 18-майда эле кабыл алынган, бирок эми гана белгилүү болду.

Америка мыйзамдарына ылайык, АКШга кулдардын жана балдардын эмгеги колдонулган жана эмгек кодекстерин бузуу менен өндүрүлгөн товарларды алып кирүүгө тыюу салынат.

Америкалык белгилүү Crowell & Moring юридикалык компаниясы бул чектөөнү “Пахта кампаниясы”, “Түркмөнстандын альтернативдүү жаңылыктары” жана Эмгек укуктары эл аралык форумунун петициясына байланыштырууда. Алар АКШ мыйзамдарына таянып, түркмөн пахтасын импорттоого тыюу салууну сунушташкан.

Петицияга кол койгондор түркмөн өкмөтү бюджет кызматкерлерин жана 10-15 жаш курактагы балдарды мажбурлоо жолу менен ырааттуу түрдө пахта теримге мажбурлай турганын билдиришкен. Мындан тышкары бийлик бул көйгөйдү чагылдырган журналисттерди жана укук коргоочуларды куугунтуктап келери айтылган.

Буга чейин H&M, IKEA, Inditex жана VF түркмөн пахтасын жана текстилин колдонуудан баш тарткан. “Пахта кампаниясынын” башчысы Мэттью Фишер-Дали Түркмөнстандагы пахта индустриясы боюнча көз карандысыз экспертиза жүргүзүүгө мүмкүн болбой жатканын айтты. Анын билдиришинче, бийлик бул маселени катуу көзөмөлдөйт, жарандар болсо ачык сүйлөөдөн коркушат.

Булак: Борбор Азия жанылыктар кызматы

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *