Алмаз Үсөнов, президенттин аппарат жетекчиси: “Президент Талас элинен кечирим сурабайт!”

Президенттик аппараттын жетекчиси Алмаз Үсөнов Таластагы митинг жана анда айтылган талаптар тууралуу “Азаттык” радиосуна комментарий берди. Ал Таластагы митингдин артында “Республика-Ата-Журт” фракциясынын лидери, 15-октябрдагы президенттик шайлоодо ат салышкан Өмүрбек Бабановдун тарапкерлери турат деп эсептейт. Президент Алмазбек Атамбаев Манас жөнүндө туура айтканын жана митингчилерден кечирим сурабай турганын белгиледи:

– Бабановдун жактоочуларынын митингине катышкандар Манас бабабыздын Каныкей апабызга өлүм алдында айткан керээзин укпай ката кетиришкендерин моюнга алышы керек. Мусулмандар үчүн Куран ыйык. Эгерде облустун имамы эл алдына чыгып, Курандан сүрөө окуса, ал эми адамдар ышкырып, кыйкырышса, аларды өз динин сыйлабаган динсиздер дешмек да, туурабы? “Манасты” Абыке-Көбөштүн тукумдары гана уккусу келбейт. Президенттин митингчилердин ушул жоругун айыптаганы туура болгон. Бабановчулар сөз нугун башка жакка буруп, элди козутканды коюп, мындан туура жыйынтык чыгарышы керек.

Президент Алмазбек Атамбаев 18-октябрда мыкты окуган студенттерге стипендиялардын сертификаттарын тапшырып жатып Таласта шайлоодон кийин өткөн митингди сынга алган. Акция катышуучулары “Манас” эпосунан үзүндү окуп берейин деген мурдагы губернатор Дайыр Кенекеевди сүйлөтпөй койгонун айтып, муну Манасты сыйлабастык деп атаган.

Андан кийин Таласта 29-октябрда митинг өтүп, президенттин билдирүүсүнө нааразылык айтылган, катышуучулар Атамбаевдин кечирим суроосун талап кылышкан. Президенттик аппарат буга жооп кайтарып, мамлекет башчынын сөздөрүн туура кабыл алууга чакырган. Бүгүн ушундай эле талап менен Талас шаарындагы облустук администрациянын имаратынын алдында митинг өтүп жатат.

Булак: Азаттык

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *