Азия Ньюс: Саясый күлкү

Склероз

Рахман Разыковдон анекдот.

Бир картаң абышка эне сүтү оозунан кете элек жаш кызга үйлөнөт экен. Алгачкы нике түнүндө абышка төшөктө колуктусунун жанына отуруп алып суроо берет:

— Эми эмне кылыш керек?

— Билбейм.

— Китептерден окуган жок белең?

— Жок.

— Курбу кыздарың да айтышкан жокпу?

— Жок.

— Кара басып, мен да унутуп калбадымбы…

Кыйналган экен

Гезиттеги макаладан: “Кечээ түн жарымда Жыргал-Сай көчөсүндөгү “Эрозона” секс дүкөнүнө ууру кирди. Ал алып кеткен нерселерге караганда, ууру жалгыз окшойт. Көптө-ө-н бери жалгыз жашайт окшойт”.

Багы жокко дагы жок

Турсунбек Акундан анекдот.

Төрт-беш жигит кафеде ичип отурушат. Баары шатыра-шатман, арасында бирөө гана үтүрөйүп көңүлсүз.

— Сага эмне болду? – деп сурайт отургандардын бири.

— Акыркы кездери дегеле жолум болбой жүрөт. Каякка барбайын таяк жеп келе турган болдум. Азыр да жүрөгүм бир жамандыкты сезип турат.

— Сен андай ырымчыл болбо да. Андай эски ырым-жырымдарга “тү” деп түкүрүп салыш керек. Кана “тү” дечи?

— Тфу!

— Ой, энеңди урайын келесоо! Эмнеге менин салатыма түкүрдүң? Азыр оозуңду кан жалата коёюнбу?!

Адекваттуу жаза

Тынчтык Шайназаровдон анекдот.

Бир жигит уулун тилдеп атат:

— Сени тамеки тартып баштаптыр дейт го? Апасы, менин курумду алып келе калчы?

— Ата, ал деген чыныгы сигарет эмес, электрондук сигарет болчу, – дейт уулу чый-пыйы чыгып.

— Электрондук дейсиңби? Апасы, анда үтүктү алып кел!

Атасынын баласы

Борончудан анекдот.

Бир жигиттин жаңы эле көз жарган аялы төрөт үйүнөн чыгып келет. Бактылуу ата жыпжылаңач ымыркайды кармалап көрүп атат.

— Омей, чочосунун чоңдугун карасаң!

— Ага эч камтама болбо, – дейт анда аялы соортуп. — Чочосу окшошпогону менен көздөру кудум эле сеники болуп турбайбы.

Ойготпо

Сабыр Мукамбетовдун кеңештеринен: “Урматтуу аялдар, эч качан күйөөңөргө “мен жок болсом эмне кылат элең?” деп айтпагыла. Эркек деген келесоо болот. Ойлоно баштайт”.

Жыныстын касиети

Дүйшөн Керимовдун аныктамасынан: “Аялзаты балмуздактай болушу керек, тоюс, даамдуу болуп, эрип турушу керек. Эркек кофедей болушу керек, тоюс, күчтүү болуп, уктатпашы керек”.

Шектүү киши

Нурлан Сарчаевдин аныктамасынан: “Эгер балык уулаганы кеткен эркектана кечке жуук колуна балык көтөрүп сопсоо келсе, ал – браконьер”.

Барби

Нурбек Мурашевден анекдот.

Таң эртең аялы менен күйөөсү чай ичип отурушат.

— Жаңы секретарашаң кандай неме экен? – деп сурайт аялы.

— Жакшы эле. Жогорку билими бар экен, ишке жоопкер.

— Мурагы секретаршаң барби куурчакка окшош эмес беле, мунуң да ошондойбу?

— Бир аз окшойт.

Ушу тапта полдо ойноп отурган беш жашар кызы сөзгө аралашат:

— Ата, сенин куурчагың  да жаткызганда көзүн жумуп алабы?

Чын сүйүүнүн белгиси

Гүлнур Сатылгановадан анекдот.

Бир жигит сүйгөн кызына ышкысын билдирип атат дейт:

— Айпери, мен сени ушунчалык жакшы көрөм, сенин атыңды үйүмө жазып койгонго даярмын.

— Кандай дейсиң?

— “Сенин атыңды үйүмүн үстүнө чоң кылып жазып койгонго даярмын” дейм.

— Эгер сүйгөнүң чын болсо, анда үйүңдү менин атыма жаздырып кой.

Күйөө керек

Калыгул Бейшекеевден анекдот.

Бир кыз курбуларына чакыруу кагазын жөнөтүп жатат дейт: “Жан курбуларым, кийинки айдын алтысында турмушка чыкканы жатам. Келип, ак тоюма күбө болгула. Эч кандай белектин кереги жок. Бир гана суранычым: мага үйлөнө турган бирөөнү ээрчите келгилечи…”.

Булак: Азия Ньюс 

 

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *