Видео – Бакыт Төрөбаев: “Эгер мен президент болуп шайланып калсам резиденцияда жашабайм, резиденцияны аксакалдар эс алуучу борбор кылып жарыялайм”

«Өнүгүү-Прогресс» партиясынын Ысык-Көл облусунда болуп өткөн аймактык конференциясында партиянын лидери Бакыт Төрөбаев  «Өнүгүү-Прогресс» партиясы берген убадасын дайыма аткарарын белгиледи. Бул туурасында партиянын пресс-кызматы билдирди.

Эскерте кетсек, партия парламентке келээрдин алдында 60 машино-трактордук станция (МТС) ачарын убадалаган. Көп өтпөй эле Ысык-Көл облусунун Дархан айылында 60-чы МТС ачылды. Партия лидеринин айтуусу боюнча, мындай МТСтер Кыргызстандын ар бир айылында болушу зарыл.

«Бул МТСтердин аркасы менен миңдеген дыйкандар үй-бүлөлөрүн багып жатышат. Кыргызстандын өнүгүшү үчүн аймактарды көтөрүү керек. Эгер аймактар күчтүү болсо, анда мамлекет дагы күчтүү болот», – деди Бакыт Төрөбаев.

Мындан тышкары аталган партия туурасында жайылган жалган, ушак маалыматтар боюнча дагы партиянын лидери Бакыт Төрөбаев билдирүүлөрдү жасады.

«Биздин партиябыз туралуу айтылып жаткан ушактар чындыкка жатпайт. “Партияны Максим Бакиев каржылайт. Бакиевдердин партиясы” деген сөздөр жалган. Аталган партия Бакиевдердики эмес, бул элдин партиясы. Мен муну кудайдын алдында туруп айтып жатам. Андай ушактарга ишенбегиле», – деди Бакыт Төрөбаев.

Фракция лидери жолугушунун алкагында эгерде президент болуп шайланып калса, “Ала-Арча” мамлекеттик резиденциясын кары-картаңдар эс ала турган эс алуучу жайга айлантаарын айтты.

«Эгер мен президент болуп шайланып калсам азыр президент жашаган резиденцияны аксакалдар эс алуучу борбор кылып жарыялайм. Мен ал жерде жашабайм. Менин өзүмүн үйүм бар. Мен өзүйүмдө жашайм. Жумушка үйүмөн барам. Мен силер ичкен сууну ичем, мен силер баскан жолду басам, мен силер жашаган үйдө жашайм. Силер баскан тротуарда басам. Силер баскан баткакта басам, Кыргызстан азыр турган баткакка мен да кирип, Кыргызстанды баткактан алып чыгам. Чогуу алып чыгабыз. Силер мага ишенгиле, мен силерге ишенем. Ак ниетим менен элиме кызмат кылууга даярмын. Биримдик жана ынтымакта жеңишке жетүүгө мүмкүн», – деп белгиледи Төрөбаев.

Ал эми конференцияга Чүй, Талас, Нарын жана Ысык-Көл облустарынан келген 500дөн ашуун делегаттар президенттикке аттанып жаткан Бакыт Төрөбаевди колдой тургандыктарын айтышты. Белгилей кетсек, ушундай эле партиялык конференция буга чейин  Жалал-Абад, Баткен облустарынан келген делегаттардын катышуусунда Ош шаарында болуп, алар дагы партия лидерин толук колдой тургандыктарын билдиришкен.

Булак: Кyrgyztoday.kg

 

1 ой-пикир

  • Абдыкерим says:

    Албетте, чет олколордун башчылары келсе уйундо жаткырып, делегацияларды Семетей мейманканасына жайгаштыр, аны да кузго чейин сатып жиберишпесе. Делегацияларды ташып жургонго эки-уч араба чиркей ала турган кубаттуу тракторлордон алып келип кой, кортеж кылып. Баса, чет элдин президенттерин уйумдо коноктойм деп Ала-Арчанын тейлоо кызматын уйуно алып келип алсан кандай болоор экен? Президент болом дегендердин денгээли ушул болуп жатканынан жарыбай жатабыз да.

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *