ФИФА Кыргызстан — Казакстан жолдоштук беттешинин официалдуулугун жокко чыгарды

Кыргызстандын жана Казакстандын курамалары 30-августта жолдоштук беттеш өткөрүп, кыргыз футболчулары атаандашын биринчи жолу 2:0 эсебинде утуп алган эле. Бул жыйынтыктар ФИФАнын рейтингине таасир этип, Бириккен Араб Эмирлигинде 2019-жылы өтүүчү Азия чемпиондугуна карата даярдык катары сыпатталган. Бирок, ФИФА командалар шартты бузуп, 6 жолку алмашуунун ордуна 7 жолку алмашууну макулдашкандыгы үчүн деп беттештин официалдуулугун жокко чыгарды. Эми оюндун жыйынтыгы рейтингге дагы таасир этпешин билдирди.

semetej-sultanov

Кыргыз футбол федерациясынын президенти Семетей Султановдун айтымында, жети алмашуу киргизүү демилгеси казак тарапка таандык. Анын маалыматына таянсак, башкы максат көбүрөөк футболчуларды талаага чыгарып, потенциалын аныктоо болгон. “Кыргызстан менен Казакстандын жолдоштук беттеши өтө принципиалдуу оюн болгон. Ошондуктан бир алмашуу же он алмашуу болобу, эң башкысы оюндун жыйынтыгы. Мен үчүн рейтинг эмес, кураманын оюну маанилүү. Биз ФИФАга алдын-ала кат менен кайрылганбыз, календарда официалдуу деп тура берет.  Биздин башкы максатыбыз 2019-жылы өтө турган Азия кубогуна чыгуу. Ал үчүн көбүрөөк беттеш өткөрүшүбүз керек. Учурда курама кызуу даярдык көрүүдө” – дейт Султанов.

 

Спорт журналисти Бакыт Шукуралиев, командалар арасында алдын-ала макулдашуу болгонун ырастады. Бирок, маселе маалыматтын коомчулукка өз убагында жетпегендиктен келип чыгып жатканын белгиледи.

bakyt-shukuraliev

“Матч болоордун астында эки тараптын футбол федерациялары сүйлөшөт. Баардык шарттарын карап чыгышат. Алдын-ала макулдашканда ФИФА календардан алып салышы керек эле. Дагы бир маселе бул маалыматтын убагында коомчулукка жетпей калганында. Буга чейин Таджикстан менен болгон беттеш да официалдуулугун жоготкон. Анда кыргыз футболчулары 4:1ге жеңилген эле. Биз тарап Дениэл Тего кыргызстандын жарандыгын ала элек болгонуна байланыштуу, аны талаада сынап көрүү үчүн жети алмашуу жасоону суранышкан. Атаандашыбыз макул болуп, жыйынтыгы ФИФАнын рейтингине таасир эткен эмес.  Мындай көрүнүштөр дүйнөлүк практикада көп эле кездешет”- дейт журналист.

jermek-baktijar-uulu

Футбол күйөрманы Эрмек Бахтияр уулу ФИФА беттештин официалдуулугун жокко чыгарганына таң калбаганын айтты.

“Бул жаңылыкты укканда аябай деле таң калган жокмун. Казактар утулганын моюнга албай, бир айласын табаарын сезгем. Себеби Кыргызстан ФИФАнын рейтингинде100-орунга чыкканда, Казакстан 136-орунда эле. Кыргызстандан артта калганына намыстанып, эки айдын ичинде 96-орунга көтөрүлдү”- дейт күйөрман.

Эске салсак, буга чейин Кыргызстан менен Казакстан официалдуу жети беттеш өткөрүп, беш жолу тең чыгып, эки жолу утулган эле.

Элвира АКИМОВА

Булак: Де-Факто

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *