Кыргыз кыздардын мигранттык татаал турмушун мыкты ачып берген казак кыздын эмгегине арданбайлы

Москвадагы бир байкуш кыргыз мигрант кыздын ролун аткарганы үчүн казак кыз Самал Еслямова дүйнөнүн эң атактуу Канн кинофестивалында эң мыкты актриса болуп таанылды. Арабызда кээ бирөөлөр буга аябай ардануу менен кабыл алганын кантип жашырабыз? Бирок, биринчиден, бул кино кыргыздарга гана тийиштүү эмес экенин унутпасак. Арданууга эч кандай себеп жок. Кыргыз жаш кыздын Москвадагы оор жашоо окуясы Нью-Йоркто колумбиялык кыз жөнүндө, Парижде камерундук же Дубайда ливандык мигранттардын жашоосуна дал келээри үчүн, глобалдык резонанс жарата алганын эстетебиз. Экинчиден болсо, буга чейин жердешибиз Нурбек Эген жаш кыз жөнүндө “Пустой Дом” аттуу киносун убагында жакшы кабыл албай, күзгүгө таарынып, акыйкатсыздык кылганыбызды кантип унутабыз. Өзүбүздүн киночуларыбызды ошондо колунан чаппаганда, азыр бир кыргыз кыз Софи Лорен же Мэрилин Монро сыяктуу бүгүн Каннда, эртең Голливудда атагы чыкмактыр. Бирок биз боордош казак эли үчүн деле сүйүнүп коёлу, ийгилик каалагандан аянбайлы. Самал деле өзү аябай жөнөкөй үй-бүлөдө Петропавловскиде чоңоюптур. Өзү деле Москвада окуп, өзү аткарган кыргыз кыздын далай кыйынчылыктарын көрүптүр. Казак-кыргыз буга чейин деле бири-биринин кино ролдорун аткарып келген. Мисалы, “Биринчи мугалимде” Алтынайдын ролун казак Наталья Аринбасарова аткарса, снайпер Алия Молдагулованын образын кыргыз Айтурган Темирова түбөлүккө бекитип берген. Эң оболу, “Айка” аттуу кино жалпы дүйнөдө биздин, кыргыздын, бар экенине дагы салымын кошот. Ачуу чындыкка көп терикпей, ошонусуна сүйүнөлү!

Булак: “Жаңы ордо”

 

 

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *