Могерини: ЕБ Орусиядан Минск келишимдеринин аткарылышын күтөт

Евробиримдиктин тышкы саясат бөлүмүнүн башчысы Федерика Могерини жана Орусиянын тышкы иштер министри Сергей Лавров 11-июлда Брюсселде жолугуп, Ливиядагы кырдаалды, Перс булуңундагы чыңалган абалды талкуулашты. Жолугушуунун жүрүшүндөтараптар Жакынкы Чыгыштагы кырдаал боюнча сүйлөшүүлөрдүн натыйжасыздыгы, Түндүк Кореядагы абал, Украинанын чыгышындагы жаңжал тууралуу да сөз кылышты.

Биргелешкен маалымат жыйынында Могерини көптөгөн суроолор боюнча тараптардын түрдүү көз карашы сакталып жатканын белгилеп, маселе чечүү үчүн жалпы пикир зарыл экенин айтты.

Евробиримдик менен Орусиянын мамилеси 2014-жылы орустар Крымды аннексиялап алгандан кийин бузулган. Брюссель Москва Минск келишимдериндеги милдеттенмелерин аткарат деп күтүүдө.

Могерини Орусия жана АКШ президенттери Сириянын түштүк-батышында ок атышууну токтотуу боюнча Гамбургда жетишкен келишимди да белгиледи. Сергей Лавров Евробиримдик менен АКШны Башар Асаддын режимине каршы санкцияларды жокко чыгарууга чакырды. Айтымында,бул Сириядагы гуманитардык көйгөйлөрдү тереңдетүүдө.

Булак: Борбор Азия жанылыктар кызматы

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *