Памирбек Казыбаевдин Алыкултанууга болгон урматы уланууда

Базар экономикасынын алкеш-чалкеш заманы менен пенделердин пейил-ниети тарыган азыркыдай шартта көөнө тарых үчүн опол тоодой кызмат кылгандар деле бар. Мындай катардагылар мамлекеттин казынасын деле карап отура беришпей, атуулдук миссиясын эч кимге колко кылбастан эле аткара беришет. Өзгөчө кыргыз искусствосу, анын ичинде акын-жазуучулар арасы мен мисалдаткандай инсандардан куру эмес.

Анан ошондой катардын сап башында кыргыз кыйырына белгилүү калемгер Памирбек Казыбаев турат. Алтымыш жаштан ашуун өздүк мезгилинин 70 пайызын Алыкултаанууга арнап салган. Арнап эле келатат. Алыкул Осмоновдун чыгармачылыгын, жашоосун, сүйүүсүн, каармандарын, дартын, деги койчу, алп таланттын баскан изин тыкыр иликтөөгө алган урпактык күжүрмөн милдети не деген гана баага татыйт? Алыкул жашаган үйлөрдү катар-катар музейге айлантканы, ырларын, жалпы чыгармаларына кайрадан жашоо берип, басылмаларды чыгартканы ал өзүнчө сөз. Анысын кеп удулу келгенде ташка тамга баскандай айтабыз. Кезеги келгенде андай эмгектерине келечек муун менен мезгил өзү баа берет. Буга ишенем! Азырынча болгону бир жаңылыгы тууралуу сөз козгоп турайын дедим. Алтымыштан ашканда “арыдым, карыдым” дебеген биздин каарман жакында Алыкул Осмоновдун “Көл толкуну” аталышындагы жыйнагын басмадан чыгартты. Өзгөчө из жана карандай эмгеги менен. Үч тилде жарык көргөн Алыкул Осмоновдун бул жыйнагынын мазмунуна үңүлсөңүз, кыргыз, орус тилдериндеги бөлүмүндө “Толубай сынчы”, “Мырза уул менен Аксаткын”, “Карагул”, “Жеңишбек”, “Майдын түнү”, “Махабат” поэмаларынан турса, англис тилиндеги бөлүмүндө Уолтер Мэйдин котормосундагы ырлары жана “Жеңишбек” поэмасы киргизилген.

Алп классиктин ырларынан куралган аталган жыйнактын түзүүчү редактору Памирбек Казыбаев өзү болсо, англис бөлүмүнүн жооптуу редактору, чет тилдеринде эркин сүйлөгөн Аида Памирбек кызы. Каарманыбыздын өзү эле эмес, үй-бүлөсү, кызы баш болуп минтип урпактык милдет катары Алыкултаанууга салым кошуп жатышына артыкчылыктуу баа беришибиз зарыл.

Калган сөз дагы болоор. Азырынча сыясы кургай элек бул китепти алчулар Памирбек Казыбаевге кайрыла берсеңер болот. Алыкул Осмоновдун элесин эскерип, рухунун алдында атан төөдөй кызмат кылып келе жаткан каарманыбызга алп акындын арбагы ыраазы болсо болгону!

Калыгул БЕЙШЕКЕЕВ              

Булак: “Азия Ньюс”   

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *