“Президент жана Бомж – 3” Бозымчакта тартылабы?

Элге кеңири белгилүү “Президент жана бомж”, “Москва сүйүүсү” тасмаларынын сценаристи жана продюсери Өмүрзак Төлөбеков өзүнүн жаңы тартылган “Дүйнөлүк Назарбаев” даректүү жана “Миллионердин сүйүүсү” көркөм тасмаларын Ала-Букадагы “Бозымчак” кенинин жумушчуларына жана кызматкерлерине тартуулады.

Кенчилер тасмаларды зор ынтаа менен көрүштү. Аягында эл фильмдин жаратуучусу Төлөбековго суроолорду жаадырышып, узакка маектешишти. Көрүүчүлөр “Президент жана бомж” кантип тартылганына, автордун жаңы тасмаларынын жаралыш таржымалына, алдыдагы максаттарына кызыгышты.

Кенчилердин: “Бизди, биздин кен комбинатты киного тартсаңыз жакшы болот эле” деген суроосуна Төлөбеков: “Жакында “Президент жана бомж-Зтү” тартсак деп турабыз. Сиздердин кенден келип кызыктуу эпизод тартуу тууралуу ой келди”- деди.

“Кино жаратуучу менен элдин кызыктуу жолугушуусу болду. Өзгөчө кенчилерге кыргыздын жаңы кинолорун анын автору менен кошо көрүп, аларды талкуулоо абдан таасирлүү жана жандуу өттү. Алар бир топ күнгө дейре кинону өздөрүнчө талдашып, чоң канааттануу алышты. Биз мындай иш чараларды алдыда дагы улантмакчыбыз”,- дейт кендин коомчулук менен иштешүү башкармалыгынын кызматкери Бахтияр Шаматов.

“Илгери, Советтик кезде жазуучулар, маданий ишмерлер эл менен жолугушчу эле. Ал жакшы салт катаал базар мамилеси киргени тутулуп кеткен. “Бозымчак” кенинин акимчилиги мага мындай сунуш киргизгенде чыны кызыктым. Бишкектен жолдун алыстыгына карабай ат арытып барып, эл менен, көрүүчүлөр менен кошо отуруп кинону талкуулоо, карапайым жана башкы көрүүчүлөрдун ысык пикирин угуу мага зор канааттануу тартуулап, канат байлатты,”- дейт кино продюсер Өмүрзак Төлөбеков.

Булак: “Майдан.kg”

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *