Сооронбай Жээнбеков Диний иштер боюнча Мамлекеттик комиссиянын директору Зайырбек Эргешовду кабыл алды

Сооронбай Жээнбеков бүгүн, 5-январда Кыргыз Республикасынын Диний иштер боюнча мамлекеттик комиссиянын директору Зайырбек Эргешовду кабыл алды. Бул туурасында президенттин расмий сайт жарыялады.

Жолугушууда диний чөйрөдө мамлекеттик саясаттын натыйжалуулугун мындан ары жогорулатуу, өлкөдө толеранттуу конфессиялар аралык мамилелерди орнотуу боюнча көрүлүп жаткан аракеттер талкууланды.

Президент Сооронбай Жээнбеков акыркы жылдары дүйнөдө коомду радикализациялоо жана экстремисттик, террористтик идеяларды таркатуу максатында диний чөйрөнү колдонуу өнөкөтү күчөп жатканын жана бул көрүнүш Кыргызстан үчүн да коркунуч туудурганын белгиледи. “Калктын диний чөйрөдөгү билим деңгээлин жогорулатуу боюнча жумушту күчөтүп, бардык медреселерде жана башка диний билим берүү мекемелеринде бирдиктүү окутуу программасы ишке ашырылышына көзөмөлдү күчөтүү  зарыл. Бул максатта Диний иштер боюнча мамлекеттик комиссия диний уюмдар, Кыргызстан Мусулмандарынын дин башкармалыгы, аймактардагы бийлик өкүлдөрү, “Ыйман” диний маданиятты өнүктүрүү фонду менен өз ара аракеттенишүүнү активдештирүүгө тийиш. Салттуу диндин негиздерин калкка жеткирүү керек” – деп белгиледи Президент.

Ал диний чөйрөдөгү мамлекеттик саясат светтик мамлекеттин принциптерине таянып жүргүзүлүшү зарыл экендигин баса белгиледи.

Президент ошондой эле диний уюмдардын жана окуу мекемелеринин реестрин түзүп, диний радикализмдин таркашын алдын алуу максатында алардын каржылык жана башка ишмердигин көзөмөлдөөнү күчөтүү зарылдыгын белгиледи.

Диний иштер боюнча мамлекеттик комиссиянын директору Зайырбек Эргешов 2014-2020-жылдарга карата Диний чөйрөдөгү мамлекеттик саясаттын концепциясын ишке ашыруунун жүрүшү боюнча маалымат берди.

Ал билдиргендей, учурда өлкөнүн диний чөйрөсүн жөнгө салган мыйзамдардын базасын жакшыртуунун үстүндө жумуш жүрүп жатат. Мындан тышкары өлкөдөгү диний билим берүүнүн сапатын жогорулатуу боюнча иштер жүргүзүлүүдө. “Биздин негизги милдеттерибиздин бири – бул калктын жана диний ишмерлердин өздөрүнүн диний билимин жогорулатуу. “Ыйман” фонду менен биргеликте акыркы үч жылда 2500дөн ашуун имам  окутулду”, – деп билдирди Зайырбек Эргешов.

Ошондой эле диний экстремизмдин алдын алуу максатында 2017-жылы Диний иштер боюнча мамлекеттик комиссия 500дөн ашуун иш-чара-тренингдерди, семинарларды жана эл аралык конференцияларды өткөргөн.

1 ой-пикир

  • изилдөөчү-илахиятчы Акматов Маматкадыр says:

    Президентибиздин демилгеси колдоого арзыйт. Айрыкча террористтер жаныбыздагы Афганистан мамлекетине топтолуп жатышкандыгы биздин мамлекетке да чооң коркунуч туудурууда. Андан тышкары ислам динин курулай жаттап алып, чала түшүнгөн динаятчыларыздан да корккулук. Ислам динин чала түшүнгөн жана түшүндүргөн мусулмандарыбыз “артык кылам деп, тыртык кылып коюшу” мүмкүн. Ошондуктан эң акыркы жеткилең жана татаал ислам динин жана Куран китебин оболу өзүбүз мыкты өздөштүрүп, түшүнүп жана түшүндүрө алсак, анда биздин мамлекетте жана дүйнө жүзүндө зордук-зомбулуксуз, ыймандуу, ынсаптуу, таза, өнүккөн жана Кудайды түз тааныган мамлекетти кура алабыз! Ал эми террорист болом деп көзү катып турган адамдын өзү жок! Эгерде терроризм жана экстремизмге каршы күрөшүүнүн идеологиясын эч ким таба албай жатканда, аны биз иштеп чыгып, оболу элибизге, андан кийин адамзатка жеткире алсак, анда Кудайдын колдоосуна ээ болгон элге айланмакпыз! Азырынча бул идеологиянын өзөгү даярдалып бүтүп калды! Келгиле аны бүтүрүп, ишке ашыралы. Келгиле зордукчулдук эки тараптуу согушту токтотолу!

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *