Сот мурдагы премьер Серик Ахметовду чыгымдарды төлөп берүүгө милдеттендирди

Казакстанда сот мурдагы премьер-министр Серик Ахмедов жана анын кол алдында иштеген төрт аткаминерди мамлекетке келтирилген 17 миллион 310 миң теңгени өндүрүп берүүгө милдеттендирди. Алар буга макул болбой буга чейин доо арыз беришкен. Сот арызды канааттандырган жок.

Бул каражатты бешөө биригип төлөп бериши керек.

Ахмедовдун жактоочусу далилдер жок экенин айтып, чечимди өзгөртүүнү талап кылды. Ал Караганда шаарын жарыктандыруу үчүн мамыларга каражат мыйзамдуу түрдө бөлүнгөнүн жана мамлекетке эч кандай зыян келтирилбегенин билдирди.

Серик Ахметов Казакстандын өкмөт башчысы кызматын 2012-2014-жылдары аркалаган. Коррупция боюнча айыпталган аткаминер 2015-жылдын соңунда президенттен кечирим сураганына карабай, 10 жылга эркинен ажыратылган. Мурдагы премьер баштаган 21 адам, анын ичинде Караганда облусунун мурдагы бир нече жетекчиси жана жергиликтүү ишкерлер кызмат абалынан кыянат пайдаланышкан, бюджеттик каражаттарды уурдаган, ишкердик менен мыйзамсыз алектенишкен деп айыпталышкан эле.

Учурда бул иш боюнча соттолгон айрым чиновниктер эркиндикке чыгышты. Маалыматтар боюнча Серик Ахмедов Карагандадагы абактардын биринде жазасын өтөөдө.

Булак: “Борбор Азия жаңылыктар кызматы”

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *