Тажикстан: бозгун полковниктин туугандары ИМ тобу менен байланышта болушкан

«Ислам мамлекети» террор тобуна ооп кеткен полковник Гүлмурод Халимовдун туугандары тажик-ооган чек арасын кесип өтүүгө аракет кылышкан. Бирок алардын жолун милиция кызматкерлери бууганга үлгүрдү деп билдирди Тажикстандын укук коргоо органдарындагы өз булак.

Паянж дарыясынын наркы жээгинде Халимовдун туугандарын “Ислам малмекети” экстремисттик тобунун жоочулары күтүп турганы айтылууда. Өз булактын кабарлашынча, мурагы полковниктин алыскы тууганы жана кошунасы Насим Рахматов ИМдин Ооганстандагы жоочуларынин бири менен дайыма байланышта болуп турган.

Бир тууган Халимовдор 4-июлда түштөн кийин эки унаа менен Хамадони районун көздөй бет алышкан. Аларды кармоо операциясына Дүйшөмбүнүн ИИБ кызматкерлери кошулган. Халимовдор тобокелчиликке барбай, чек арага жакын жайгашкан Чубек айлына эл сейрек каттаган жол менен жетүүнү чечишкен. Бирок Ибрати кыштагынан алыс эмес жерде аларды милиция күтүп турган.

Ал жерде кагылышуу болуп, топту жетектеп бараткан 53 жаштагы Султонмурод Халимов менен иниси Фозил Халимов жана мурдагы полковниктин айылдаштары – Афзал Абдурашидов, Насим Рахматов өлтүрүлгөн. Дагы үчөө – Али Халимов, Комил Халимов жана Назир Халимов кармалган. Атайын операция учурунда ИИМдин уюшкан кылмыштуулукка каршы күрөшүү башкармалыгынын жетекчи орун басары Анвар Хусейнов жаракат алган.

42 жаштагы полковник Гүлмурод Халимов Тажикстан ОМОНнун командири кезинде, 2015-жылдын апрелинде жоголуп кеткен. Кийин Сирияда жүргөнүн билдирген. Акыркы кабарларга караганда ал өткөн жылы Ирак менен Сирияда «Ислам мамлекети» террор тобунун аскер министрлигине дайындалган.

Тажик бийлиги аны мекенге чыккынчылык кылды деп Интерпол аркылуу издөөгө алган. Кошмо Штаттары анын жүргөн жери тууралуу маалымат бергендерге 3 млн доллар убада кылган.

Булак: “Борбор Азия жаңылыктар кызматы”

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *