Тажикстан: ишкер аял суракта милиция жылаңач чечинүүгө мажбурлаганын билдирүүдө

Тажикстандын Спитамен районунун тургуну Кибриё Юлдошева жергилитүү милиция кызматкерлери сурак маалында аны кордоп, жылаңач чечинүүгө мажбурлагандыктарын билдирди. «Дунё» деген ашканага ээлик кылган Юлдошева быйыл майда документ жасалмалоо айыбы менен кармалган.

Кибриё Юлдошеванын айтымында, аны Спитамен райондук милициясынын үч кызматкери суракка алган.

«Алар кийимдин алдына үн жаздыруучу түзмөк катып койгон болушуң мүмкүн деп, мени жылаңач чечинүүгө мажбурлашты. Мен алардан уяттуу жерлеримди жаап алайын деп өтүндүм, бирок алар уруксат беришкен жок. Жылаңач бойдон алардын суроолоруна бир нече саат жооп бердим», – деди ал.

Кибриёнун айтымында, милиция кызматкерлери ага тийген эмес, бирок алардын көз караштары менен берген суроолору аны кемсинткен. Сурактын эртеси ал милиция кызматкерлерине даттанып, Башкы прокуратурага кайрылган. Учурда бул ишти иликтөө менен райондук прокуратура алектенүүдө.

Кибриё Юлдошева
Кибриё Юлдошева

Спитамен райондук ички иштер башкармалыгынын тергөө бөлүмүнүн башчысы Юнус Бахронов Кибриё Юлдошеваны милиция кызматкерлери суракка алганын ырастады. Бирок ал кызматкерлердин ишкер айымды жылаңач чечинүүгө мажбурлагандыгы тууралуу билдирүүнү четке какты. Анын айтымында, Юлдошеванын даттануусунан кийин мекемеде ички териштирүү иштери жүрүп, анын жыйынтыгында тергөөчүлөр тараптан эч кандай мыйзамга каршы аракет болбогону аныкталган.

Кибриё Юлдошевага каршы алдамчылык беренеси менен кылмыш иши козголгон. Азырынча анын иши боюнча тергөө аяктай элек. Эгер Юлдошева бул берене боюнча күнөөлүү деп табылса, ири өлчөмдө айыппул төлөп же эки жылга эркинен ажыратылышы мүмкүн. Ишкер айым банкка 6 миң доллар өлчөмүндөгү насыясын кайтарып бергенин билдирүүдө.

Өткөн аптада Өзбекстандын Саманканд облусунда жергиликтүү тергөөчүлөр уурулукка шектелип кармалган эки аялды жылаңач чечинүүгө мажбурлап, аны видеого тартканы аныкталган.

Булак: “Борбор Азия жаңылыктар кызматы”

 

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *