Тажикстанда уландарды армияга чүчүкулак аркылуу тандашууда

Исфара районунун Чорку жамаатында акыркы эки жылдан бери балдарды чүчүкулак аркылуу аскерге алып кетишүүдө. Демилгечилердин билдиришинче, бул аскерге чакыруудагы теңсиздикти жоюуга жардам берүүдө.

Бул ыкмага ылайык, жалгыз уул жана аскерге жарабагандардан башка уландар ысымдарын кагазга жазып, аларды аралаштырып “лотерея” ойнотушат. Аттары биринчи чыккан 3-4 бала аскерге жөнөтүлөт.

Чорку – Исфорадагы эң ири жамааттардын бири, 29 мааледен турат. Алардын ар биринде эки миңден ашуун улан аскер курагында. Бирок жамаатта тажик куралдуу күчтөрүнүн катарында кызмат өтөөнү самагандар аз. Өз ыктыяры менен жоокер болууну каалагандар жетишпей калганда, ар бир маалеге тизме түзүп, аскерге чакырылуучуларды топтоо тапшырмасы берилет.

Жергиликтүү тургундардын айтымында, буга чейин биринчи кезекте кембагал үй-бүлөлөрдүн балдары аскерге жөнөтүлүп келген. Чүчүкулак ыкмасы мындай теңсиздикти жоюуга жардам берүүдө.

Тажикстанда 18 жаштан 27 жашка чейинки курактагылар армияда кызмат өтөйт.

Булак: “Борбор Азия жаңылыктар кызматы”

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *