Видео – Өзбекстанда район башчысы 45 мүнөттүк чогулушта 126 жолу адепсиз сөздөрдү айткан

«Азаттыктын» өзбек кызматына Ташкенттин Паркент районунун пахта штабынын 1-ноябрдагы чогулушу маалында жазылып алынган аудио файлды жөнөтүшкөн. Анда пахта талааларына жетиштүү адам жөнөтпөгөндүгү жана мамлекетке пахта тапшыруу боюнча туура эмес маалыматтарды бергендиги үчүн ишканалар менен уюмдардын жетекчилерин, ошондой эле маале аксакалдарын сөгүп жаткан район башчысы Нематулла Абдуллаевдин үнү жазылган.

Аудиожазуунун автору билдиргендей, чогулушта Нематулла Абдуллаев пахта тапшырууда туура эмес маалымат берилгендиги боюнча Бекабад районунун башчысына, прокуроруна жана милиция жетекчисине кылмыш иши козголгонун айтып, бул аны тынчсыздантып жатканын билдирген.

«Колледждер 1,5 тонна пахта тапшырганын жазып, чынында болгону 700 килограмм беришкен. Кечээ 3 тонна тапшырганыңарды айтып, бирок 700 гана килограмм бергенсиңер жалаптар», — деп сөккөн район акими колледж директорлорун.

​Андан соң район башчысы жыйынга катышып жаткан прокурор менен милиция башчысына кайрылып, пахта теримге жетиштүү адам чыгарбаган жана ак була тапшырууда туура эмес маалыматтарды берген уюм жетекчилеринин автоунааларын камакка алып, номурларын чечип алуу буйругун берди.

45 мүнөттүк аудиожазууда Абдуллаев чогулгандарга карата 126 жолу адепсиз сөздөрдү айткан. Бирок аткаминер бул маалыматтарды четке какты. “Мен пахта тапшыруу боюнча туура эмес маалыматтарды бергендиги үчүн аларды урушкандырмын. Эгер кимдир бирөөнү кемсинтсем, мени сотко берсин”, – деди ал.

Булак: “Борбор Азия жаңылыктар кызматы”

 

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *