Жогорку Кеңештин депутаттары Баку шаарында өткөн ТүркПАнын тармактык комиссиясынын кезектеги жыйынына катышышты

Кечээ, 3-ноябрда Жогорку Кеӊештин депутаттары Калдарбек Баймуратов менен Төрөбай Зулпукаров Түрк тилдүү өлкөлөрдүн Парламенттик Ассамблеясынын (ТҮРКПА) Укук маселелери жана эл аралык мамилелер боюнча комиссиясынын Азербайжандын Баку шаарында «ТүркПАга мүчө-мамлекеттердин антитеррордук мыйзамдары боюнча биридиктүү көз карашын иштеп чыгуу» темасында өткөн VI отурумуна катышты. Бул тууралуу Жогорку Кеңештин басма сөз кызматы билдирди.

Комиссиянын отурумунун ишин Түркия Улуу Улуттук Жыйынынын депутаты Исмет Учма алпарды. Жыйын жүрүшүндө анын катышуучулары терроризмге каршы күрөшүү боюнча эл аралык келишимдерге жигердүү катышуу зарылдыгын белгилешип, ТүркПАга мүчө-мамлекеттердин бири-бирине укуктук көмөк көрсөтүү жаатында ой-пикир алмашты.

Ошондой эле иш-чарага Азербайжандын, Казакстандын, Кыргызстандын, Түркиянын парламентчилери менен эксперттери катышты.

Белгилей кетсек, ТүркПА ага мүчө-мамлекеттердин мыйзамдарын өз ара жакындаштыруу жана шайкеш келтирүү боюнча сунуштамаларды кабыл ала турган парламенттер аралык уюм болуп саналат. Ал сунуштамалар мүчө-мамлекеттердин парламенттери мыйзам кабыл алууда эске алынууга тийиш.

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *