Зилалиев: Чүй облусунда логистикалык борбордун ачылышы – айыл чарба тармагын өнүктүрүү үчүн инфраструктураларды түптөөдөгү маанилүү кадам

Чүй облусунда логистикалык борбордун ачылышы – айыл чарба тармагын өнүктүрүү үчүн инфраструктураларды түптөөдөгү маанилүү кадам. Бул тууралуу Кыргыз Республикасынын вице-премьер-министри Дүйшөнбек Зилалиев «Кыргызцентрпродукт»  ЖЧИ тарабынан курулган логистикалык борбордун ачылышында билдирди. Мындай маалыматты өкмөттүн расмий сайты жарыялады.

«Биздин өлкөнүн экономикасында айыл чарба маанилүү ролду ойнойт. Калктын 65% ашыгы айыл жеринде жашап, айыл чарба тармагында эмгектенет. Муну эске алуу менен Өкмөт айыл чарба тармагына өзгөчө көңүл буруп, экспортко багытталган азыктарды колдоп, импортту алмаштыруучу ишканаларга жеңилдетилген насыяларды берүүдө», – деди ал.

Вице-премьер-министр Дүйшөнбек Зилалиев заманбап айыл-чарбасы- азыктарды өндүрүү, өстүрүү, кайра иштетүү жана маркетинг боюнча салымдардан турган уюшулган система экендигин белгиледи.

«Чүй облусунда логистикалык борбордун ачылышы аймактагы дыйкандарга айыл-чарба азыктарын өстүрүп  сорттоого, топтоп сатууга даярдоого,  аларды сактоого жана аны ишке ашырууга мүмкүндүк берет. Бул борбор Чүй облусунун дыйкандарына өсүмдүктөрүн өндүрүүнү жогорулатуу үчүн стимул болот жана айыл-чарба секторун өнүктүрүүгө салым кошуп, ЕАЭБ өлкөлөрүнүн ортосундагы экспорту көбөйтүү жана сатууга жакшы жардам берерине ишенем», – деди вице-премьер-министр Дүйшөнбек Зилалиев.

Маалымдама: Логистикалык борбор бир эле убакытта 4 200 тонна айыл-чарба азыктарын (картошка, сабиз, капуста, пияз) жууп, сорттоп сактай алат.

Ишкана заманбап үлгүдө курулуп, жергиликтүү азыктардын ЕАЭБ өлкөлөрүнө чыгуусуна шарт түзөт.

«Кыргызцентрпродукт» ЖЧИ Ысык-Көл, Нарын, Чүй облусунун дыйкан-фермерлеринен айыл-чарба азыктарынын 6 түрүн сатып алууну пландаштыруда.

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *