2010-жылдын 7-апрелинде болуп өткөн Апрель төңкөрүшүнүн активдүү катышуучусу, азыркы бийликке да оппозициялык көз карашта жүргөн Кыргызстандын патриоттук күчтөрүнүн координациялык кеңешинин мүчөсү Жолдош Орозовду телефондон коркутуулар көбөйүп, бүгүн сабап кетишти. Бул тууралу Жолдош Орозов өзүнүн фейсбуктагы баракчасы аркылуу билдирүү жасады
“Урматтуу Достор! Мен кечээ Бишкек шаарынын мэриясына Унгар-Тоо боюнча патриоттук күчтөрдүн координациялык кеңешинин 30-мартта саат 10-00 өткөрө турган митингинин билдирүүсүн таштагам. Бүгүн эртең менен эрте Ички иштер министрлигинин 10-бөлүмү, Биринчи май райондук акимиаты эскертүү иретинде жазышкан кагаздарын беришип, митингди Максим Горькийдин эстелигинин жанында өткөргүлө, эгер ал жерде өткөрбөсөңөр чара көрөбүз, соттун чечими бар, 24-марттан 10-апрелге чейин Ак үйдүн жанына митинг өткөргөнгө болбойт, деп эскертип, соттун чечиминин көчүрмөсүн беришти. Аларга мен бул конституциялык укугум экенин, ал Кыргызстанда жашаган адамдардын укугу, эркиндиги, экенин түшүндүрдүм.
Бүгүн, саат кечки төрт чамаларында мага номери секреттелген телефондон бирөө чалып, оозго алгыс сөздөр менен сөгүп,(аны сиздерге мен уялып жаза албай жатам) негизгиси Темир Сариевге тийишпе, деген сөзүн айтты.
Кечки саат жетилерде балдар менен жолугушуп, сегизден өткөндө үйүмө маршуруткадан түшүп келе жатсам “Гольф-3” маркасындагы автомашина алдыма келип токтоп, машинадан 3 жаш, денеси чон балдар түшүп: “эртең өткөрүлгөнү жаткан митингди сен кылып жаткан турбайсыңбы, эмнеге элди бузуп өткөрүп жатасыңар, силердин башыңарда ким турат? деп жулкуп сабаганга чейин барышып, кийип турган курткамды жулкушуп, төш жагын айрып салышты. Эртең митинг жакшы бүтпөсө бизден жакшылык күтпө деп кетип калышты. Мен Бакиевдин учурунда да ушундай кордуктарды көрүп. токмок жеген күндөрүм болгон, бирок эч кимге колко кылган эмесмин. Мени капа кылып жаткан нерсе азыркы бийлик башында тургандар менен чогуу Бакиевдерге каршы күрөшүп, эми ошолордон көргөн кордук 100% кайталанып жатканына ыза болуп турам. Мейли мени кеткен эки бийлик да коркута алган эмес, булар да коркута албайт. Кыргыз элинин жери кертилип сатылып жатса кайдыгер карап жатып алмак белем. Урматтуу достор, азыркы бийлик ким катачылыктарын айтып чыкса душман катары көрүп, куугунтуктап, камап жатышат. Мына булардын жүзү!”
Жолдош Орозов, Апрель төңкөрүшүнүн катышуучусу
КОММЕНТАРИЙ КАЛТЫРУУ