Ууруну карма деп ууру жүрөт

Кыргыз балакет эле эл болот. Баарын алдын ала айтып коёт. «Ууруну карма деп ууру жүрөт»- деген кеп да айткан. Дегеним, Мамкаттоо кызматынын статс-катчысы Нурлан Шерипов 100 миң сом па­ра алып жаткан жеринен кармалганын Коррупцияга каршы кызматы кабарлады. Окуя боюнча Шериповго жана мекеменин дагы бир кызматкерине карата кылмыш иш козголуп, экөө тең Бишкек милициясынын убактылуучу кармоочу жайына камалды.
Кылмышка шектүү Нурлан Шерипов Мамкаттоо кызматынын статс-катчылыгына былтыр июль айында дайындалган. Ал мекемеде кадрдык, каржылык жана уюштуруу маселелерин тейлечү. Кызыгы, юридика илимдеринин эң жаш доктору аталган Шерипов кезинде «Кыргыз Республикасындагы мамлекеттик кызматкерлердин коррупцияга аралашуусу тууралуу түшүндүрмө» деген сыяктуу китеп да жазып чыгарган. Кайран жигит, турмуш аны так ошол аңга тыгаарын кайдан билиптир.
Булак: “Де-факто”