Кыргызстандын окуучулары АКШда өткөн Эл аралык экологиялык долбоордук Genius Olympiad олимпиадада биринчи орунга ээ болушту. Бул тууралуу эл аралык «Себат» билим берүү мекемесинин басма сөз кызматы билдирди.
2016-жылдын 12- июнунан 17-июнга чейин АКШнын Освего шаарында Эл аралык экологиялык долбоордук Genius Olympiad олимпиадасы болуп өттү. Олимпиадага дүйнөнүн 65 өлкөсүнөн окуучулар катышты. Кыргызстандын атынан Эл аралык “Себат” билим берүү мекемесинин “Айчүрөк” лицейинин 12 окуучусу катышты. Олимпиаданын жыйынтыгы менен “арт” категориясы боюнча 1 алтын, 6 күмүш жана 1 коло медалга ээ болуп кайтышты.
Олимпиадада кыска метраждуу видеосу менен Соурбаева Айсулу жана Баратали Айназ биринчи орунду ээлеп, алтын медалга ээ болушту. Ал эми Нуржанова Малика жана Маринина Арина экологияга байланыштуу ыры менен 2-орунга ээ болуп күмүш медалдар менен сыйланышты. Ошондой эле Орозматова Сайкал, Кумушбек кызы Айканыш, Каримбекова Нурида жана Миррахимова Малика экология темасындагы карикатуралары үчүн күмүш медалга ээ болушуп 2- орунду ээлешти. Дагы бир кыска метраждуу видеосу менен Айбек кызы Айгерим 3-орунду ээлеп, коло медал ээ болуп кайтты.
Эл аралык экологиялык долбоордук Genius Olympiad олимпиадасы илим, арт жана дизайн категориялар боюнча өткөрүлүп келет. Кыргызстандан барган команда 10 экологиялык долбоорлор менен аттанышкан.
КОММЕНТАРИЙ КАЛТЫРУУ