Биздин Ак үйдөгү маалымат булактарыбыз билдиргенине караганда Алмаз Атамбаев КР Борбордук шайлоо комиссиясынын жаңы төрагасы (төрайымы) кылып азыркы президенттик аппараттын жетекчисинини орун басары Нуржан Шайлдабекованы шайлоого тымызын буйрук берген. КР БШКнын жаңы составын жана жаңы төрагасын шайлоо – бул 2017-жылы өтө турган президенттик шайлоого алгачкы даярдыктардын бири.
Кыргыз Республикасынын Борбордук шайлоо комиссиясы 2011-жылы июнь айында шайланган эле. Быйыл мөөнөтү бүтүп жатат. Жакынкы күндөрдө парламент БШКнын жаңы курамын шайлайт. Мыйзам боюнча 12 адамдан турган БШКнын курамынын үчтөн бир бөлүгүн, тактап айтканда 4 талапкерди президент тандап көрсөтөт, үчтөн бирин, 4 талапкерди Жогорку Кеңештин көпчүлүк коалициясы сунуштайт. Ал эми калган 4 талапкерди парламенттин оппозициялык фракциялары (“Республика-Атажурт”, “Бир бол”) тандашат.
“Ата-Мекен” фракциясы Гүлнара Журабаеваны сунуштады.
КСДП фракциясы Адилет Сатыгуловду түртүп жатат.
“Өнүгүү-Прогресс” фракциясы Назарали Ариповду
“Кыргызстан” фракциясы Акылбек Эшимовду
“Бир бол” фракциясы Абдыжапар Бекматовду жана Кайрат Осмоналиевди
“Республика-Атажурт” фракциясы Атыр Абдрахматованы жана Елена Жылкычиеваны сунушташууда.
Ошондо 12 адамдан турган БШКнын 8 талапкери Жогорку Кеңеш тарабынан аныкталды. Ал эми Алмаз Атамбаев расмий түрдө 21- июнда, шайлоолорду жана референдумдарды өткөрүү боюнча Борбордук комиссиясынын мүчөлүгүнө шайлоо үчүн төмөнкү 4 талапкерлерди көрсөттү.
– Асаналиев Алмаз Турдакунович;
– Баатырова Гүлнара Маришовна;
– Кадыров Бахтияр Сабиржанович;
– Шайлдабекова Нуржан Кармабековна.
Бул жерде айта кете турган бир жагдай Жогорку Кеңештин “Кыргызстан” фракциясы БШКнын мүчөлүгүнө ошол эле БШКнын азыркы төрагасы Туйгуналы Абдраимовду көрсөтүүнү каалап жатышкан. Бирок фракциянын лидери Канат Исаевди Алмаз Атамбаевдин кеңешчиси Икрамжан Илмиянов өз кабинетине чакырып, “аныңар жарабайт” деп тыйып, “президент суранып жатат Акылбек Эшимовду көрсөткүлө” деп “ынандырат”. Андан сырткары оппозициялык “Бир бол” фракциясынан көрсөтүлүп жаткан эки талапкердин бири – Кайрат Осмоналиев да президенттен таңууланган талапкер. Ал эми КСДП фракциясы Алмаз Атамбаевдин секретаршасы, кийин эсепчиси болуп иштеген кызматкеринин баласы Адилет Сатыгуловду шефинин суранычы менен көрсөткөнүн эске алсак, жаңы БШКнын 12 адамдан турган составынын 7 мүчөсү жеке Алмаз Аттамбаевдин сунушу менен шайланып, БШКда чечүүчү, көзөмөлдөчү добушка ээ болот. Төрагалыкка да президент көрсөткөн киши шайлангандан кийин анан кайдагы “таза шайлоо” жөнүндө кыялданасыңар? БШК 2017-жылдагы президенттик шайлоону толук Атамбаев каалагандай жыйынтык менен өткөрүп берүүнү кынтыксыз аткарып берүү үчүн алдын-ала даярдалууда.
КР БШКнын жаңы составын жана төрагасын шайлоо жакынкы убактарда өткөнү турат.
Булак: Кyrgyztoday.kg
КОММЕНТАРИЙ КАЛТЫРУУ