Бийлик тарабынан каарманыбызга ар кандай ушак-айыңдар айтылып, учурда коомчулукта күдүк ойлор жаралып атты эле, натыйжада, бул маектешүүбүз кө-өп нерсеге чекит коет го. “Убактылуулар” бири-бирин чукуп атышып, элди эриктирбей калды көрүнөт.
– Эдил мырза, өткөндө Топчубек Тургуналиев айтыптыр. “Роза Отунбаева Убактылуу өкмөттү жетектеп турганда, Эдил Байсалов аркылуу Кадыржан Батыровго паспорт берип качырып жиберген” деп. Чын эле ошондой беле?
– Ушул жалганды миллион жолу “жалган” деп айтсак дагы, баары бир кайталанып келетат. Кадыржан Батыров 2005-жылы март айында депутат болгондо алган диппаспортунун беш жылдан кийин мөөнөтү бүткөн. Ал 2010-жылы апрелде Кулов, Масалиев жана башка саясый-коомдук ишмерлердин арасында Убактылуу өкмөт түзгөн коомдук кеңешке кирип, ал кеңештин төрага орунбасары болуп шайланат. Ошол кеңештин мүчөсү катары мага кайрылганы чын, “диппаспортту алмаштырып бергиле” деп. Мыйзамга ылайык анын кайрылуусу ТИМге жөнөтүлүп, ал жактан “берүүгө негиз жок” деген жооп келген. Канча жолу кайра-кайра сурап кайрылганына карабастан, анын диппаспортунун мөөнөтү узартылган эмес. Эми ошончо эле Убактылуу өкмөт Батыровдун суранычын канааттандыра турган болсо, Конституциялык сотту таркаткан революциялык бийлик “диппаспортту басып бергиле” десе, беш мүнөттө алып келишмек. Бирок андайга эч ким барган жок. Ишенбесеңер ТИМден текшерип алгыла. Ал жерде баардык документтер жайында. Эч кандай мыйзам бузуу болгон эмес. Дагы бир жолу эскерте кетчү нерсе, бул окуя апрель айында болгон. Мен болсо Убактылуу өкмөттөн коррупцияга протест кылып, 25-майда пресс-конференция өткөзүп, чыгып кеткем, июнь окуяларына чейин эле. Ошондуктан “Батыров өкмөттөн диппаспорт алып качырылыптыр” деген карандай калп. Бул жерде кызыктуусу, ушул сөздү Топчуке Тургуналиев айтып атканы. Кайран киши, жакшы карып атат, сакалын өстүрүп, бакай калпагын кийип, өзүнчө эле кыргызга кинодон келген даанышмандай деп атсак, баягы эски бузуку, интриган жаны баарыбир кычышат экен да. Бул кишинин Отунбаевага таарынычы, 2010-жылы “билим берүү министри болом” деп элдин баарына догурунуп, “менин заслугам бар, министр болом” деп кадимкидей жер тепкилеген. Өкмөттүн 13 мүчөсү бир добуштан муну министр кылып шайлаганына карабастан, Отунбаева бул чалга министрликти бербей койгон. Ошондон бери ичи күйүп, байкуш бышылдап жүрүптүр. Эми болсо Атамбаевге жагынып, “дүжүр болом” дегени го.
Арстан Алгырбеков
Булак: “Азия Ньюс”
КОММЕНТАРИЙ КАЛТЫРУУ