Алматыда Шанхай кызматташтык уюмуна (ШКУ) мүчө өлкөлөрдүн атайын кызматтары «жанкечтилердин катышуусундагы теракттардын алдын алуу боюнча биргелешкен чараларды көрүү» маселесин талкуулашат. Мекеме башчылары аймактык антитеррористтик түзүмдөр кеңешинин жыйынында жолугушат. Бул тууралуу жергиликтүү маалымат агенттиктер билдиришти.
«Жыйында жанкечтилер катышкан теракттардын алдын алуу жана ШКУга мүчө мамлекеттердин аймагында диний радикал идеологиялардын жайылышын токтотуу боюнча биргелешкен чараларды көрүү маселеси талкууланат», — деп билдиришти уюштуруу комитетинен.
Ошондой эле жыйында «терроризм идеяларынын интернет аркылуу таралышын токтотуу», «ШКУ өлкөлөрүнүн коопсуздугуна коркунуч жараткан террорчул, сепаратисттик жана экстремисттик уюмдардын ишмердүүлүктөрүнө каршы биргеликте күрөшүү» маселелери каралат.
Маалымдалгандай, жыйынга Казакстан, Кытай, Кыргызстан, Орусия, Тажикстан жана Өзбекстан өлкөлөрүнүн атайын кызматтарынын делегациялары катышат. Учурда жыйын кайсы күнү өтөрү такталууда.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ