2010- жылдын 9-апрелинен тартып 2011- жылдын 5-декабрына чейин улуттук коопсуздук мамлекеттик кызматын (УКМК) жетектеген Кеңешбек Дүйшөбаевди кимдер билбейт. “Үч тамгадан” шыпырылган соң маңзатын жөнгө салуу боюнча мамлекеттик кызматын азыноолак башкарганга да үлгүргөн жайы бар. Апрель революциясы айрымдар үчүн чоң жоготууну алып келсе, Кеңешбек Асанбекович үчүн ири байлык топтоого мыкты шарт түзүп бериптир. Бул тууралуу интернеттеги “Фейсбук” баракчасындагы “Мародёрлор тууралуу чындык” (“Вся правда о мародёрах”) аталыштагы группада К.Дүйшөбаевге жана анын уул-кыздарына катталган мүлктөр сурөтү менен кошо жарыяланды. Өмүр бою күч түзүмдөрүндө эмгектенген генералдын апрель окуясынан кийин “хансарайларды”, элиталык батирлерди алганынын сырын чечмелей албай убарабыз…
Макаланын башында баса белгилегендей, Кеңешбек Дүйшөбаев өмүр бою мамлекеттик кызматты, тагырагы, күч структурасында эмгектенген адам. Жалаң айлыкка иштеген киши кабат-кабат “хансарайларды”, элиталык батирлерди сатып ала албашы аштан бышык. Ал үчүн, бир гана жол бар – ашынган коррупционер болушуң керек. Бул өңүттөн алып караганда, Кеңешбек мырза мамлекеттин, элдин эсебинен байыган чиновникпи деп кетесиң. Себеби, ал ушу тапта бир нече батирлердин,үйлөрдүн ээси. 2012-жылдын 9-октябрында Ысык-Көлдөн жер тилкесин сатып алганга да үлгүргөн.
“Атасынын баласы кыйын чыккан замана” демекчи,генералдын карачечекей уулу Азат Дүйшөбаев апрель окуясынан кийин эле расмий түрдө 6 кыймылсыз мүлк сатып алган, алар:
1.Чүй облусунун Аламүдүн районундагы кыймылсыз мүлк (2016-жылдын 15-марты);
2. Чүй облусунун Аламүдүн районундагы жер тилкеси (2016-жылдын 15-марты);
3. Чүй облусунун Аламүдүн районундагы Байтик айлындагы “Давос” вип шаарчасындагы жер тилкеси (2013-жылдын 23-июлу);
4. Чүй облусунун Аламүдүн районундагы Байтик айлындагы “Давос” вип шаарчасындагы жер тилкеси (2013-жылдын 23-июлу);
5. Бишкек шаарынын 8-кичирайонундагы коммерциялык багыттагы имарат (2012-жылдын 29-ноябры);
6. Бишкек шаарындагы үй (2012-жылдын 30-майы).
Ушундан улам мыйзам ченемдүү суроо туулат: кайсы каражатка мынча мүлкту сатып алды. Суроого Азат Кеңешбекович өзү гана жооп бербесе, биз аныгын биле албадык.
Ушул жерден бир кыстырма. Кеңешбек мырзанын бир кара чечекей кызы Айзада Кеңешбековна Дүйшөбаева 2010-жылдын 17-майында Чүй облусунун Аламүдун районунан кыймылсыз мүлк сатып алган. Дагы суроо салабыз: кайсы каражатка? Эмне үчүн атасы УКМК төрагасы болгондон кийин сатып алган?
Сүрөттөр “сүйлөйт”, баалар “бакырат”, эл жоопту күтөт…
Коомчулуктун бүйүрүн кызыткан батирлер, “особняктардын” өңү-түсүн элге ачык көрсөтүш үчүн, алардын айрымдарынын сүрөтүн комментарийсиз жарыялайбыз. Кеттик, анда!
Борбордогу Панфилов көчөсүнүн №190 үйүнүн №2 батири К.Дүйшөбаевдин уулу Азат Дүйшөбаевге таандык. Базар баасы 3 млн. сомду чамалайт.
Бишкектеги Тажик көчөсүнө барсаңыз, №23 үй дароо көзгө чалдыгат. Билермандардын айтымында, ал өлдү дегенде 100 миң доллардын башын жутат. Ээси – кадимки генерал Кеңешбек Дүйшөбаев.
Табалдиев көчөсүндөгү №64 даректе жайгашкан мына бул “особняк” шилекейиңизди агызып атабы? Анын ээси дагы Кеңешбек Асанбекович. 200 миң долларга бааланган “хансарай” кайсы каражатка келгени бир Кудайга, анан генералга белгилүү болсо керек…
Мобуреги сүрөттөгү ажайып үйдүн кожоюну Азат Дүйшөбаев “особнякты” сатып алыш үчүн 120 миң долларды кайдан тапты болду экен, ыя?
Кеңешбек мырза “хансарайларда” жашагандан зериккенде 8-кичи районундагы №46/1 дарегинде жайгашкан мына бу элиталык батирине кетип калат. 5-6 млн. сомду “ап” этчү батирге каражат кайдан табылганы коомчулуктун бүйүрүн кызытып турган чагы.
Ошол эле үйдөгү береги “Армада” фитнес борбору убагында 100 миң долларга сатылып алынган экен. Оңбогондой киреше алып келчү клуб Кеңешбек Дүйшөбаевдин наамына катталган.
Чүй облусундагы “Байтик” айылында жайгашкан “Давос” вип-шаарчасындагы мына бул курулушу бүтө элек үй Азат Дүйшөбаевге караштуу. Базар баасы кеминде 7 млн. сомду чапчып жыгылат.
Ошол эле “Давостогу” 13 сотых жер да Азат Кеңешбековичтин наамына катталган. Өтө эле “жирно” эмеспи, ыя?
Мына бул сүрөттөгү жердин аянты канча деп ойлойсуз? Биздеги маалыматка караганда, 5 гектарга барабар. Ал Лебединовка айылындагы МТФ-2 көчөсүндөгү №4 даректе жайгашкан. Маалыматтарга таянсак, аны Азат Дүйшөбаев 20 миң долларга сатып алыптыр. Дагы суроо салгыбыз келет: кайсы каражатка?
Ошол эле 5 гектар жерди ээлеген участоктун жанында 23 миъ 100 чарчы/метр аянттагы жер тилкеси да Азат Кеңешбековичтин жеке менчигине айланган. Базардагы баасы 5 млн. сомдон кемди көрсөтпөйт.
Сарыбагыштардын лидерине суроо салгыбыз келет, жооп береби?
Кеңешбек Дүйшөбаев акыркы мезгилде Сарыгабыш уурусунун өкүлдөрүнүн башын кошуп, алдыдагы президенттик шайлоого кызуу камданып атканын маалымат каражаттары жазышууда. Апрель революциясынын шарапаты менен миллиондорду чапчыган кыймылсыз мүлктөрдү сатып алган Кеңешбек Асанбекович космостук ылдамдыктагы баюунун сырын коомчулукка ачыктар. Же адатынча унчукпай кутулабы? Болочоктогу президенттикке талапкердин саяпкери болчу адам аны да коррупционер кылып тынбайбы? Эгер кокусунан бийлик башына келип калса, экөөлөп Кыргызстанды сатып жибербейби дүңүнөн?
Egemen.kg
Редакциядан: Албетте биз калыстык үчүн экинчи тараптын да үнүн угуп, бул материалдарга жооп берсе, генерал Дүйшөбаевге гезит бетинен оорун беребиз. Мынча байлыкты кайдан тапканын коомчулукка ачыктап койбосо, чын эле бетке чиркөө болбойбу?..
Булак: “Азия Ньюс”
КОММЕНТАРИЙ КАЛТЫРУУ