Тажикстанда жеке адвокаттарды ишкерлерге теңөө чечими күчүнө кирди. Эми алар ишкерлердей салык төлөп башташат.
Тажикстандын Салык комитетинин чечимине ылайык, жеке ишмердүүлүк менен алектенген адвокаттар ишкерлерге теңелип, мамлекетке кошумча салык төлөп турушу керек болот. Жактоочулар үчүн кирешесинин 6% өлчөмүндөгү жөнөкөйлөтүлгөн жаңы салык киргизүү тууралуу чечимге Салык комитетинин төрагасы Нусратулло Давлатзода ушул жылдын 5-сентябрында эле кол койгон, бирок анын тексти мекеме сайтында 31-октябрда гана пайда болду. Чечим 2016-жылдын 1-ноябрынан тарта күчүнө кирди.
Буга чейин Тажикстанда жеке адвокаттык ишмердүүлүк менен алектенген юристтер социалдык салык катары мамлекетке кирешелеринин 1% төлөп келишкен. Эми аларга «жөнөкөйлөтүлгөн» деп аталган алты пайыздык жаңы салыкты да төлөөгө туура келет.
Жактоочулар салык органдарында өлкөнүн Юстиция министрлиги тарабынан берилчү лицензиялар боюнча катталышат.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ