Сирияда Орусиянын аба соккусунан үч түрк аскери мерт кетип, он бири жарадар болду. Hurriyet Daily News басылмасынын маалыматына караганда, окуя Эль-Баб шаарында кокустан болгон; орусиялык снаряддардын бири түрк жоокерлери жашаган үйлөрдүн бирине барып тийген.
Орусиянын Куралдуу күчтөрүнүн Башкы штабы орус учагы Эль-Баб шаарынын аймагында аскердик тапшырманы аткарып жатып, кокустан түрк жоокерлери турган объектке сокку урганын ырастады. Орусия тарап сокку атайылап жасалбаганын билдирди.
Буга байланыштуу Орусиянын президенти Владимир Путин Түркия лидери Режеп Тайып Эрдоганга телефон чалып, көңүл айтты.
Кремлдин басма сөз кызматынан кабарлашкандай, телефондук сүйлөшүү маалында тараптар Сириядагы “Ислам мамлекети” террордук тобуна каршы аскердик аракеттерин координациялоо боюнча да макулдашты.
Булак: “Борбор Азия жаңылыктар кызматы“
КОММЕНТАРИЙ КАЛТЫРУУ