Билим берүүнүн эл аралык стандартына карай бет алган Ош мамлекеттик юридикалык институту өнүккөн мамлекеттердин ири жогорку окуу жайлары менен карым-канташын ар тараптан өнүктүрүүдө. 2017-жылдын 4-мартында Казакстандын эмгек жана социалдык мамилелер академиясы менен Ош мамлекеттик юридикалык институту биргеликте онлайн аркылуу илимий- практикалык конференция уюштурушту. Бул туурасында ОшМЮИнин басма сөз кызматы билдирди.
Евразиялык кызматташууда мыйзамдуулукту өнүктүрүү, азыркыдай шартта экономиканын каржы секторун өнүктүрүүнүн актуалдуу жагдайлары, компьютердик жана маалыматтык технологияны өнүктүрүүнүн абалы, келечеги тууралуу жана башка актуалдуу маселелер талкууланган онлайн иш чарасында Кыргызстан, Украина, Азербайжан, Беларуссия жана Казакстандын жогорку окуу жайлары катышты. Онлайн аркылуу уюштурулган эл аралык конференцияда Кыргызстандан жалгыз Ош мамлекеттик юридикалык институту катышты. Анда ОшМЮИнин ректору юридика илимдеринин кандидаты Эгемберди Токторов сөз сүйлөп, мындай иш чаралар ар тараптан кызматташууга өбөлгө түзүп жатканын баса белгилөө менен илимий баяндама жасады. Андан кийин Казакстан, Украина, Азербайжан жана Беларуссия өлкөлөрүндөгү жогорку окуу жайлардын окумуштуулары жылуу маанайдагы каалоолорун билдирип, илимий докладдарын окушту.
Эл аралык илимий-практикалык конференциянын алгачкы жолу мындай ыкмада өткөрүлүшү катышуучуларга өзгөчө ынгайлуулукту жаратты. Анткени катышуучулар өздөрүнүн жогорку окуу жайларында отуруп эле онлайн аркылуу бири-бирин көрүп, илимий докладдарын угуп, өз ара талкуу жүргүзүү мүмкүнчүлүгүнө ээ болушту. Мында окумуштуу-окутуучулар менен бирге илимге кызыккан студенттер да илимий докладдары менен катышып, билимин ар тараптан өнүктүрүү үчүн кеңири маалымат алышты.
КОММЕНТАРИЙ КАЛТЫРУУ