Казакстан аялдары жумуш ордуларындагы зомбулук менен ыдык көрсөтүүлөрдүн түрдүү формаларынан корголбогон бойдон калууда. Бул тууралуу БУУнун Казакстандагы туруктуу өкүлү Норимас Шимомуранын Аялдардын эл аралык күнүнө карата жасаган кайрылуусунда айтылат.
«Биз Казакстандын өкмөтүн, жарандык коомчулукту жана жеке тармактарды аялдардын жетишкендиктерин колдоого, көйгөйлөрдүн бар экенин моюнга алууга, алардын жумуш ордуларындагы укуктарына жана гендердик теңчиликке көңүл бурууга чакырабыз», — деп айтылат БУУнун кайрылуусунда.
Ошондой эле анда Казакстандын мыйзамдарында «сексуалдык ыдык көрсөтүү» түшүнүгүнүн түшүндүрмөсү жок экени жана аялдар коомдук жайлардагы зомбулук көрсөтүүлөрдөн корголбогону белгиленген. БУУнун маалыматы боюнча коомдук жайларда сексуалдык ыдык көрсөтүү учуруна күбө болгон адамдардын 25 пайызы эч кандай аракет көрүшмөк эмес.
Уюмдун маалыматына караганда, Казакстанда аялдар арасындагы жумушсуздуктун деңгээли эркектердин жумушсуздугуна салыштырмалуу жогору бойдон калууда. Саламаттыкты сактоо, билим берүү жана социалдык кызмат көрсөтүү тармактарындагы жалданма жумушчулардын 70 пайызын аялдар түзөт. Ошондой эле алардын көбү формалсыз тармактарда же үй кызматчылары катары иштешет. Мындай учурларда аялдар менен жумуш берүүчүнүн ортосунда оозеки гана келишим болуп, үй кызматчыларынын укуктары корголбойт.
Булак: Борбор Азия жаңылыктар кызматы
КОММЕНТАРИЙ КАЛТЫРУУ