Эсиңерде болсо, Аскар Акаевдин, Курманбек Бакиевдин тушунда бир-эки жыл күч органдарында иштей коюп, генералдык чин даражага жеткен «апельсиндер» толтура. Таңгалганыбыз, Болот Сүйүнбаев жети жылдан бери УКМКнын карамагында иштеп келатат, учурда орун басарлык кызматты аркалоодо. Бул инсан таза жана чынчылдыгы менен көптөрдөн айырмаланып турат. Аскердик наамга да ашыкпайт экен, бирок, учурдагы кызматына жараша генерал-майор болсо мыйзамга ылайык келмек. Калыстык кайда? Президент Алмазбек Атамбаевдин айланасындагы чиновниктер ушу кезде иргелип калды, Данияр Нарымбаевге окшогондор камалып чыкты, дагы башкасынын байлык топтогону билинип калып, короодон алыс кетти. Айтор, мисалдар арбын. Бир гана Боке башта кандай болсо, эч кандай өзгөрүлбөстөн эле келатат, дүнүйө-мүлккө кызыкпаганы, кадр саясатына аралашпаганы, тек гана өзүнө милдеттүү жумушту аткарганы менен мамлекетчил кадрга айланды. Кээде сырттан карап туруп, кейип кетесиң да, сыйлык берип аткандардын арасына ит-кушу да аралашып кеткени, ал эми Сүйүнбаевдей мырзалар, октон жалтанбагандар көңүлдөн сырт калып келүүдө. Кыскасы, эр азаматтын жети жылдык эмгеги азыр бааланбаса да, келечекте урмат-сыйга бөлөнсө керек. Бирок, мамлекеттик кызматтын эрежесине ылайык, чин-даражалар татыктуу адистерге өз убагында берилиши мыйзам ченемдүүлүк да. Ким билет? Бул жагынан алдыга жулунбаган, ток пейил адам унутта кала береби?..
Булак: “Азия ньюс”
КОММЕНТАРИЙ КАЛТЫРУУ