Ош облусунун казысы Самидин кары Атабаев жетектеген казыят жамааты “Чечендик өнөрдү өнүктүрүү” семинарына катышышты. Семинарды Бишкектеги “Чечендик өнөр” мектебинин Ош бөлүмүнүн тренери Нуркамил Абдуллаев өттү. Бул туурасында Ош облусунун мусулмандар казыятынын маалымат кызматы билдирди.
Семинардын алгачкы сабагы “Эл алдына чыгып сүйлөөдөгү коркунуч, сүрдөө жана толкундоону жоготуу” темасында болуп, туура, так таза жана маданияттуу сүйлөө жолдору, сөз байлыкты арттыруу, коркуу, тартынуу, сүрдөө жана жүрөксүнүүнү терс көрүнүштөрдөн башкаруу, кыймыл-аракеттерди туура пайдалануу, вербалдык жана вербалдык эмес байланыштар, көпчүлүктүн алдында сүйлөөнү иштеп чыгуу жана үндү туура коюу ыкмасы жөнүндө алгачкы түшүнүктөр берилди. Мындан сырткары семинардын жүрүшүндө толкундоону салмактоо боюнча пайдалуу көнүгүүлөр үйрөтүлүп, практикалык тапшырмалар жасалды. Семинарга жетекчи катары катышкан облус казысы Самидин кары Атабаевдин айтуусунда дин кызматкерлери дайыма коомчулуктун алдында идеология жайылтып, Исламдын баалуулуктарын жана бийик адеп-ахлактык тарбияга үндөө багытында иш алып баргандыктан, ойду жогорку деңгээлде жеткирүү жана ырааттуу сүйлөө техникаларын өздөштүрүүгө милдеттүү экендигин белгиледи. Мындан сырткары учурда казыят жамааты риторика боюнча курсту улантуу боюнча чечим кабыл алгандыгын жана аталган окуу курсуна облустагы мечит имамдарын да катыштыруу зарыл экендигин билдирди.
КОММЕНТАРИЙ КАЛТЫРУУ