Атадан артык уул, атадан кем уул анан атага тең уул төрөлөт дейт кыргызда дал ушул макалдын төркүнүн түшүнгөнү да түшүнбөгөнү да бүгүн саясий элитага баш багып, ата кадыры менен кыз, соодагер кадыры менен бөз өтүп турган кези. Жогорку Кеңешке жаш жаңы саясий элита келди деп төш каккылашканы менен баягы эле бий-болуштун балдары келип, “алтын жаштар” түзүп жаткандыгы жашыруун эмес. Албетте илгерки советтер союзундагыдай саанчылар менен чабандар депутат болмок түгүл, ак үйдүн карооолу менен пол жууй турган кызматына дагы кабыл алынбасы анык. “Алтын жаштар” демекчи бир кездеги депутат, министрдин балдары эле жаңы жаш саясий элитаны түзүп жаткандыгына ич тарыбайт деле, болгону интрига менен ирип, өзүн аппак көрсөткүсү келгени менен көөдөнүндө эч нерсе жоктугу ойлондурбай койбойт.
Жогорку Кеңештин депутаты Элвира Сурабалдиева дал ушундай атанын кызы деген ат менен парламентке КСДПнын квотасы менен келген. Бирок жыл айланып Сурабалдиева кыз кылыгын башкача көрсөткөнгө өттү окшойт. Адеп атасы Жыргалбек Сурабалдиевдей олуттуу сөз сүйлөп, орчундуу иш кылган атанын кызы экен дегендердин тилегин таш каап, аркасынан кетти. Алгач жыл башында энесиндей болгон, депутат Чолпон Жакупованын Баш мыйзам кабыл алынса мандатымды өткөрүп берем деген антын шылдыңга алып, гүл менен узатабыз деген дагы бир депутат сөөрөйүбүз Евгения Строкова менен жазышкан каты жарыкка чыкты. Албетте жаштыгына салгандыр дегенибиз менен Сурабалдиевага бир жаман сөз айтпаган кесиптешинин парламенттен кетип жатканына кубанган Сурабалдиева бийлик дегенде жалпагына жата калчудай эле таасир калтырды. Арийне атанын уулу болуш урмат, эненин кызы болуш кымбат дегендей Сурабалдиева энесиндей болгон эжени шылдыңга алганы эрдик эмес, анын дагы да болсо акылынын тайкы экендигинен кабар берет эмеспи. Бирок арадан канча убакыт өткөнү менен Сурабалдиева парламентте акылдуусунуп социалдык баракчаларда өзүнүн кылган ишин, айрым министрлик, кызматтардын ишин кескин сынга алганды адат кылды да калды. Кыргыз эли канчалык адам жаман болсо дагы меймандос болуп, анын жаманын жаап жакшысын ашырганды жакшы көргөндүгүнөн, Сурабалдиеванын кылган кылыктарына көзүн жумуп, мейли эми деген сайын Сурабалдиева оңкосунан кетип бараткандай.
Кечээ болсо Саламаттыкты сактоо министрин кызматтан алууга кызыкдар болуп, твиттердеги баракчасына КСДП фракциясынын көпчүлүк депутаты кетиргенге макул болду деп интрига түзгөнгө жетишти. Ал эми КСДПнын лидери Иса Өмүркулов иштегенге мүмкүнчүлүк берели деген пикирин ортого салган. Ошондо КСДПда Иса Өмүркуловдон дагы Эльвира Сурабалдиева кыйын болуп калдыбы? Ак халатчандардын кайсы бир тобу Батыралиевди кетсин дегени менен кайсы бир тобу иштешип жатат, ал эми Сурабалдиева жогорудагыдай интрига жаратуу менен кадр тармагына кийилигишүү менен эмнени эңсеп жатканы белгисиз. Айтмакчы өзүнүн кесиптештери Самигулина менен Строкованын айткандарына шилтеме жасаган Сурабалдиева Карамушкинаны кошуп алып, парламентте эмес үйүндө уй саап, нан жаап, самогон кайнатып же базарда отурса.
Булак: “Ачык саясат”
КОММЕНТАРИЙ КАЛТЫРУУ