«Нур Отан» фракциясынын мүчөлөрү Иосиф Сталиндин тушунда Советтер Союзундагы жапырт камоолор, кыйноолор жана өлтүрүүлөрдүн курмандыктарын эскерүү иш-чарасын өткөрүүнү сунушташты.
Фракция мүчөлөрүнүн тиешелүү кайрылуусу өлкө премьер-министри Бакытжан Сагинтаевге жөнөтүлдү. Анда 1937-жылдагы өлкөдөгү кандуу тазалоолордун башталышынын 80 жылдыгын белгилөө зарылдыгы көрсөтүлгөн.
«Ал репрессиялардын жыйынтыгында көптөгөн саясий ишмерлер менен улуттук интеллигенция өкүлдөрү «эл душмандарынын» катарына киргизилип, атылган же узак мөөнөттөргө абактарга камалышкан», — деди фракция мүчөсү Карибай Мусырман.
Тарыхчылардын маалыматы боюнча, сталиндик репрессиялар маалында Казакстанда кеминде 22 миңдей киши атылган.
Советтер Союзундагы ири террордун башталышынын 80 жылдыгына байланыштуу депутаттар илимий-практикалык конференцияларды уюштуруп, билим берүү мекемелеринде ачык сабактарды, маданий жайларда окуу жыйындары менен көргөзмөлөрдү өткөрүүнү, ошондой эле тематикалык документалдык тасмаларды жана театралдык оюндарды көрсөтүүнү сунушташты.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ