Алматыда сот БТА Банктын мурдагы башчысы Мухтар Аблязовдун ишине байланыштуу айыпталып 10-февралдан бери камакта жаткан журналист Жанболат Мамайды дагы бир ай абакта калтыруу боюнча чечим чыгарды. Бул тууралуу сөз эркиндигин коргогон “Адил сөз” уюму билдирди.
Маалыматта Жанболат Мамайды 10-майга чейин камакта калтыруу боюнча чечим чыккандыгы айтылат.
Сот отурумуна чейин Жанболат Мамай эч кандай кылмыш жасабаганын жана өзүнө карата ачылган иште саясий өңүт бар экенин билдирген. Сотко келген отуздай адам Мамайды үй камагына бошотууну сурап, анын эч кайда кетпей турганына кепил болушарын өтүнүшкөн.
«Саяси калам. Трибуна» гезитинин редактору Жанболат Мамай мурдагы банкир Мухтар Аблязов тарабынан уурдалды делген БТА банктагы акчаларды адалдаштырууга айыпталып, февралдын башынан бери камакта. Мамай коюлган айыптарды четке кагууда. 2009-жылдан бери Европада жашап жүргөн оппозициячыл саясатчы Мухтар Аблязов айыптоону «абсурд» деп атап, Мамай менен эч качан жолукпаганын билдирген.
Буга чейин бир катар эл аралык укук коргоо уюмдары казак бийлигин журналистти бошотууга үндөшкөн.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ