Өзбекстандын президенти Шавкат Мирзиёев 4-5-апрелде Орусияга барат. Сапардын алкагында өзбек лидери Орусия президенти Владимир Путин менен жолугат. Бул тууралуу Кремлдин басма сөз кызматы билдирди.
Бул Мирзиёевдин президент болгондон кийинки Орусияга жасаган алгачкы расмий сапары болот. Ал президенттин милдетин аткаруучу кызматына сентябрда, өлкөнүн туңгуч президенти Ислам Каримов өлгөндөн кийин дайындалып, декабрда өткөн кезексиз шайлоодо мамлекет башчысы болуп шайланган.
Путин Мирзиёев менен өткөн жылдын сентябрында, Каримовду акыркы сапарга узатуу зыйнатынан кийин Ташкентке барганда жолуккан.
Орус маалымат агенттиктери 3-апрелде кабарлагандай, өзбек президенти бул сапарынын алдында Орусия менен жетишилген аскердик-техникалык кызматташтык келишимин ишке киргизген мыйзамга кол койду.
Мирзиёев президент катары өзүнүн алгачкы чет өлкөлүк сапарын өткөн айда Түркмөнстанга жасаган. Андан кийин 22-23-мартта иш сапары менен Казакстанда болуп кайткан.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ