Түркия президенти Режеп Тайип Эрдоган Анкара террордук деп эсептелген сириялык топторго каршы жазында жаңы чабуулдарды баштай турганын жарыялады. Өткөн аптада Түркия “Ислам мамлекети” тобунун жоочуларына жана Түркия менен чектеш райондордогу күрд козголоңчуларына каршы башталган “Евфрат калканы” операциясы аягына чыкканын билдирген.
Эрдоган чек арага жакын аймактардагы операциялар Күрдистан жумушчу партиясы (РКК) менен “Элдик коргонуу отряддары” (YPG) сыяктуу түзүмдөргө каршы багытталарын маалымдады. YPG ИМ тобуна каршы күрөшүүдө Кошмо Штаттардын өнөктөшү болуп эсептелет, бирок Түркия бул түзүмдү террордук деп эсептейт.
“Террорчуларга жетүү үчүн биз башка аймактарда жаңы операцияларды баштоого даярдык көрүп жатабыз”—деди Эрдоган 3-апрелде. Ал жаңы операциялар кайсы жерде болорун так айткан жок.
Буга чейин Сириянын Ракка шаарындагы ИМ тобунун таянычына Түркия менен биргеликте чабуул жасоо боюнча АКШнын пландары ишке ашкан эмес. Вашингтондун YPG түзүмдөрүн кубаттоосу буга себеп болгон.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ