Бишкекте парламенттик «Ата Мекен» фракциясынын лидери Өмүрбек Текебаевди колдоо акциясы өттү. Митингдин катышуучулары коррупцияга жана алдамчылыкка айыпталып жаткан саясатчынын мыйзамсыз камалганын айтышып, аны бошотууну талап кылышты.
Ак үй алдына 50дөй киши чыкты. Акцияга жарандык активисттер, камактагы депутат Өмүрбек Текебаевдин тарапкерлери, “Ата Мекен” фракциясынын депутаттары, Бишкектеги Саясий туткундарды коргоо комитетинин өкүлдөрү катышты.
Митингдин жүрүшүндө “бийликти күч менен басып алууга аркеттенген” деген негизде соттолгон камактагы оппозициячыларды бошотуу талабы да айтылды.
Милиция сот 25-апрелге чейин Бишкектеги Горький гүлбагынан башка жакта митинг өткөрүүгө тыюу салынганын эскертти. Бирок чогулгандардын акциясы уланып, ага тартип сакчылары көз салып турушту.
“Ата Мекен” фракциясынын лидери, депутат Өмүрбек Текебаев орусиялык Леонид Маевскийден пара алган деп айыпталып, 25-апрелге чейин УКМКнын тергөө абагына камалган. Оппозициялык саясатчы бул айыпты “саясий куугунтук” деп баалап жатат.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ