21-апрелде Кыргыз Республикасынын Жогорку Кеӊешинин Төрагасы Чыныбай Турсунбеков, депутат Каныбек Иманалиев кыргыз мамлекетинин түптөөчүлөрү Жусуп Абдрахмановдун, Төрөкул Айтматовдун, Иманалы Айдарбековдун, Баялы Исакеевдин жана Төрөбай Кулатовдун балдары менен жолугушту. Бул тууралуу Жогорку Кеңештин Басма сөз кызматы маалымдады.
Чыныбай Турсунбеков совет учурундагы саясый репрессия курмандыктарынын балдарына кайрылып, эл-жер үчүн эмгек кылып, бейкүнөө курман болгон аталар жалпы кыргыз элинин атасы экенин баса белгиледи. “Ошол аталарыбыздын эбегейсиз эмгеги менен бүгүнкү эгемендүү Кыргызстандын пайдубалы түптөлгөн. Алар бир үй-бөлүнүн гана кызыкчылыгы үчүн курман болбостон, жалпы улуттун эртеӊи деп жүрүп каза тапкан. Андыктан, ар дайым эскерип жүрүү менен, алардын даӊазалуу ысымдарын түбөлүккө калтыруу бүгүнкү жана келечектеги муундун башкы милдети”, – дейт спикер.
“Улуу инсандардын урпактары катары балдарына кылган урматыбыз – тарыхка кылган сыйыбыз” деген Чыныбай Турсунбеков репрессия курмандыктарынын балдарына Жогорку Кеңештин Төрагасынын фондунан материалдык жардам көрсөттү. Андан тышкары, Жогорку Кеңештин Төрагасы аталган фонддон жыл сайын эки ирет ушундай материалдык жардам берилип турарын убада кылды.
Кыргыз мамлекетинин түптөөчүлөрүнүн урпактары ар дайым колдоо кылып келгендиги үчүн Жогорку Кеӊештин Төрагасы Чыныбай Турсунбековго, депутат Каныбек Иманалиевге ыраазычылыгын айтып, жалпы улуттун аталарына айланган инсандардын ысымдарын түбөлүккө калтыруу багытындагы бир катар сунуштарын ортого салышты. Жусуп Абдрахмановдун кызы Ленина Абдрахманова атасынын күндөлүгүн коомчулукка кеӊири жайылтуу зарылчылыгын айтса, Төрөкул Айтматовдун кызы Роза Айтматова “Ата-Бейит” тарыхый-мемориалдык комплексин жана андагы музейди жакшыртуу багытында иштерди улантуу керектигине токтолду.
КОММЕНТАРИЙ КАЛТЫРУУ