Казакстан Ички иштер министрлиги “Журналисттер коркунучта” фондусунун жетекчиси Рамазан Есергеповго каршы кол салуу фактысы боюнча сотко чейинки тергөө башталганын кабарлады.
ИИМ маалыматы боюнча Есергепов бычак жегенин 14-май күнү таңкы саат төрттө айткан. Поезд коштоочусу Шу станциясындагы медициналык бөлүмгө жана полицияга кабарлаган. Журналистке үч жолу бычак урулган. Учурда анын өмүрү коркунучта эмес.
Шудагы ооруканада жаткан 61 жаштагы Есергепов кол салууну кесиптик ишмердүүлүгүнө жана жарандык жигердүүлүгүнө байланыштырууда. Ага операция жасалды. Журналисттин кесиптештери аны Алматыга которуу мүмкүнчүлүктөрүн караштырышууда.
“Журналисттер коркунучта” фондунун төрагасы Рамазан Есергепов 14-майда, поезд менен Алматыдан Астанага бараткан маалда бычак жеген. Активист Астанага Евробиримдик өлкөлөрүнүн элчилери, ошондой эле эл аралык эксперттер менен Казакстандагы сөз эркиндигин талкуулоо үчүн бараткан.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ