Казакстанда экстремизмге жана терроризмге айыпталып соттолгондордун саны көбөйүүдө. Бул тууралуу Борбор Азиядагы «Эл аралык абак реформасы» (PRI) уюмунун камактагылардын радикалдашуусу боюнча изилдөөсүндө айтылат.
Андагы маалыматтарга ылайык, 2014-жылы өлкөдө экстремизм жана терроризм беренелери боюнча 154 киши камалса, 2016-жылы алардын саны 554кө жеткен. Өткөн жылы соттолгон 554 адамдын 327си «экстремизмге» айыпталышкан.
Ички иштер органдарынын ишмердүүлүгү боюнча коомдук кеңештин төрагасы Марат Когамовдун белгилешинче, экстремисттердин көбүн жумушсуздар түзөт. Арасында аткаминерлер, искусство ишмерлери, ишкерлер дээрлик жокко эсе. «Бул деген мамлекеттин социалдык саясаты өнүгүүгө, жаңыланууга муктаж дегенди билдирет», – деди ал.
PRI уюму изилдөөнүн алкагында абакта жаткан 200 адамдын арасында сурамжылоо жүргүзүп, терроризм менен экстремизм боюнча камалып жаткандардын жакындары менен сүйлөшүшкөн. Уюмдун Борбор Азия боюнча аймактык директору Азамат Шабиловдун айтымында, учурда казак абактарында үч миңден ашуун динчил адамдар бар. Алардын 763ү салафизм багытын кармангандар. Ал эми 90дон ашуун адам радикал ойлорунан кайтышкан эмес.
Изилдөөдө Казакстанда радикалдуу диний идеялардын мындан ары жайылышына бөгөт кое турган жогорку квалификациялуу жана тажрыйбалуу дин кызматкерлерине болгон суроо-талап дагы деле жогору экени айтылат. PRI көйгөйдү чечүүнүн жолдорунун бири катары Нидерландыдагыдай атайын абак имамдарын киргизүүнү сунуштоодо.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ