Ирандык эки альпинист, Махди Аббоси менен Хумаюн Манучехри Памирдин түштүк-батышындагы Карл Маркс чокусун багындыруу боюнча ийгиликсиз аракетинен кийин Дүйшөмбүгө кайтып келишти. Экспедициянын үчүнчү мүчөсү, 58 жаштагы Ахмад Некбаён тоодон кулап каза болду.
Ахмад Некбаёндун өлүмү тууралуу биринчилерден болуп Ирандык ММКлар өлкөнүн Тажикстандагы элчилигине шилтеме кылып билдиришти. Элчилик өкүлүнүн айтымында, окуя 19-майда, ирандык үч альпинисттен турган топтун Карл Маркс чокусун багындыруу аракети маалында болгон – Ахмад Некбаён кулап кетип, төмөн жактагы муздун жаракасына тыгылып калган.
Альпинист Махди Аббосинин айтымында, ал да анча терең эмес жердеги муздун жаракасына кулап кеткен, бирок колу-буту соо экенин сезген соң досторунун жардамын күтө турууну чечкен.«Мен өзүм дагы кыйналып атып араңдан зорго чыктым. 150-200 метр баскан соң терең жаракадагы Ахмаддын баш кийимин көрдүм. Биз Хумаюн экөөбүз караңгыда ага жардам бере алган жокпуз. Эртең менен барсак жок экен, жаракага түшүп кетиптир», — деди ал.
Тажик куткаруучуларынын аракетинен майнап чыккан жок — альпинисттин денеси жетүүгө оор болгон жерге тыгылып калган. Майдын аягындагы катаал аба ырайына жана кардын калың жаагандыгына байланыштуу куткаруу иштерин токтото туруу чечими кабыл алынды. Эми ирандык альпинисттин сөөгүн алып чыгуу иштери Памир тоолорунда күн жылыгандан кийин башталат.
Махди Аббоси, Хумаюн Манучехри жана Ахмад Некбаён буга чейин Эльбурсту, Килиманжарону жана Араратты бирге багындырышкан.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ