Түркмөнстанда жарандардын кирешелери азайып, жумушсуздук күчөп, накталай акчанын тартыштыгы пайда болду.
«Азаттыктын» түркмөн кызматы кабарлагандай, ишкерлердин каражаты азайып, доллар сатып алууга кудуреттери жетпей жатат. Буга байланыштуу аймактарга түрү аз, арзан товарлар келүүдө. Ашхабад базарларында дагы кардарлардын тандоо мүмкүнчүлүгү чектелүү.
Жергиликтүү серепчи Ананмырад Бугаевдин айтымында, өлкө калкынын басымдуу бөлүгүндө жашоо үчүн зарыл болгон акча өтө тартыш. Мындан улам алар азык-түлүктөрдү карызга алышууда. Маяналардын убагында берилбегендиги жана накталай акчанын жоктугуна байланыштуу жарандар «көмүскө банктарга» кайрылып, бир канча айга карыз алууга мажбур болушууда.
Расмий маалыматтар боюнча, учурда Түркмөнстанда жалпы суммасы 50 миллиард АКШ долларын түзгөн көптөгөн объектилердин курулушу уланууда.
«Өлкөдө жумушсуздук күчөп, адамдар айлык албай турган мындай шартта бул сыяктуу курулуштардын эмне кереги бар?! Керексиз хан сарайлар сыяктуу көптөгөн кымбат имараттар курулууда. Буга элдин көбү нааразы болуп жатат», – деди Аманмырат Бугаев.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ