Menu

Чыныбай Турсунбеков балдарды реабилитациялоо борборлорунан кабар алды

Бөлүшүү:

Кечээ, 5-июнда Кыргыз Республикасынын Жогорку Кеӊешинин Төрагасы Чыныбай Турсунбеков балдардын церебралдык паралич (ДЦП) жана аутизм менен жабыркаган балдар дарыланып, тарбиялануучу “Оберег” реабилитациялык борборунун иши менен таанышты. Бул туурасында Жогорку Кеңештин Басма сөз кызматы маалымдайт.

Аталган борбордо учурда ден соолугунун мүмкүнчүлүгү чектелген, тубаса илдетке кабылган 37 бала тарбияланууда. Анын ичинен 16сы күнү-түнү ушул борбордо жашайт. Мындай балдарды калыбына келтирүү, аларды кандайдыр өз алдынчалыкка үйрөтүү, мүмкүнчүлүктөрүн ачуу боюнча окутуп-үйрөтүү иштери жүргүзүлөт. 14 жылдан бери иштеп келаткан реаблитациялык борбор мэриянын жардамы менен быйыл жыл башында ушул имаратка ээ болгон.

Аталган реаблитациялык борборду баштан-аяк кыдырып, мындагы абал менен толук таанышып чыккан Жогорку Кеңештин Төрагасы балдардын чыгармачылык өнөрүнө да күбө болду. “Балдарга, өзгөчө майып балдарга кам көрүү, аларды калыбына келтирүү иштерине ыңгайлуу шарттарды түзүп берүү мамлекеттин милдети», -деп белгилеген Чыныбай Турсунбеков ары жоопкерчиликтүү, ары татаал ишти моюнуна алган жамаатка терең ыраазычылык билдирди. Ал Эл аралык балдарды коргоо күнү менен куттуктап, реаблитациялык борбордун керектөөсүнө деп Жогорку Кеңештин Төрагасынын резервдик фондунан 100 миң сом тапшырды. Жолугушуунун соңунда мекеменин тарбиялануучулары, өз колдорунан жасалган картинаны Жогорку Кеңештин Төрагасына белекке беришти. Чыныбай Турсунбеков балдардын берген картинасы жашоосундагы өзгөчө баалуу белектердин бири болгондугун айтты.

Андан соң Жогорку Кеңештин Төрагасы Чыныбай Турсунбеков аталган имараттын экинчи тарабында жайгашкан «Рука в руке» балдар мекемесине баш бакты. Мында да аутизм менен жабыркаган бөбөктөр сабак алат. Бул балдар мекемесине дагы Жогорку Кеңештин Төрагасынын резервдик фондунан каржылык жардам көрсөтүлгөн. Төрагага ал каражаттар кандай сарпталып жатканы боюнча маалымат берген мекеме жетекчиси жамаатынын жана ата-энелердин атынан терең ыраазычылык билдирди. Өз кезегинде Чыныбай Турсунбеков: “Мындай балдардын келечегине кайдыгер карабашыбыз керек, аларды камкордукка албасак болбойт. Бул Жаратканыбыздын эскертүүсү, сыноосу»- деди.

Ушул эле күнү Жогорку Кеңештин Төрагасы Чыныбай Турсунбеков Токмок шаарындагы Балдарды жана үй-бүлөнү реабилитациялоо боюнча республикалык адистештирилген борбордун ишинен да кабар алды.

100 балага эсептелген бул борбордун тарыхы терең. Ал 1950-жылдан бери иштеп келет. Адистештирилген борбордо республиканын бардык региондорунан жаңы төрөлгөн наристеден 4 жашка чейинки балдар кабыл алынат. Мында тарбияланган балдардын 45и социалдык жетимдер – ата-энелери таштап кеткен, ата-энелик укугунан ажыратылгандардын балдары.

Жогорку Кеңештин Төрагасына берилген маалыматтарга караганда бул борбордун телегейи тегиз деп айтууга болбойт. Борбордун тарбиялануучулары үчүн бардык шарттар түзүлгөн, өз ишин мыкты билген адистер иштейт. Бирок, борбордун №1 корпусу эскилиги жетип, кайра курууну талап кылып калган, короосунун ичин азыркы шартка ылайык кайра жасалгалап чыгуу муктаждыгы бар.

Борбор жамааты менен болгон жолугушууда балдардын келечеги үчүн Жогорку Кеӊеште жасалып жаткан иштер тууралуу маалымат берген Чыныбай Турсунбеков ар бир төрөлгөн балага сүйүнчү пул берүү жана көп балалуу үй-бүлөлөрдүн 3 жашка чейинки ар бир баласы үчүн 700 сом, 3 жаштан 16 жашка чейинкилерине 500 сомдон чегерүү тууралуу мыйзамдар жөнүндө учкай кеп кылды. “Балдар үчүн, алардын өсүп-өнүгүүсү үчүн, айрыкча мындай мүмкүнчүлүгү чектелген балдар үчүн майрам күндөрүндө эле эмес, үзгүлтүксүз кам көрүүгө тийишпиз. Балдарга кам көрбөгөн өлкөнүн келечеги күмөн»-деп баса белгиледи. Ошону менен катар бул борбордун кем-карчы үчүн Жогорку Кеңештин Төрагасынын резервдик фондунан 100 миң сом тапшырды.

Эч нерседен капары жок, баёо наристелер Жогорку Кеңештин Төрагасы баштаган топко Балдарды коргоонун эл аралык күнүнө даярдашкан ыр-бийлерин тартуулашты.

Эгер бул тексттен ката таап калсаңыз, ошол ката сөздү белгилеп, Ctrl+Enter кнопкаларын чоогу басуу менен билдирип коюңуз.

КОММЕНТАРИЙ КАЛТЫРУУ

Төмөндө көрсөтүлгөн уячаларга керектүү маалыматтарды туура киргизгениңизди текшериңиз.HTML-код киргизүүгө уруксат жок.

Captcha 41 − = 36

ОКШОШ МАКАЛАЛАР

Меню

Орфографиялык ката тууралуу Отчет

Редакцияга төмөнкү текст жөнөтүлөт: