Тажикстандын бардык мектептери июлдун башына чейин бирдиктүү мектеп формасы үчүн ата-энелерден акча чогултушу керек. Жазуу жүзүндөгү мындай көрсөтмөнү өлкөнүн Билим берүү жана илим министрлиги республиканын бардык мектептерине жөнөттү.
Айрым мугалимдер көрсөтмөнү белгиленген мөөнөткө чейин аткаруу үчүн күнү-түнү окуучулардын үйлөрүн кыдырууга туура келерин билдиришүүдө.
Алардын айтымдарында, мектеп формасын тигүү үчүн акча чогултуу оор болуп, алардын профессионалдык беделине зыян алып келет. Куляб шаарындагы мугалимдердин бири жайкы каникул башталганы менен жогору жактагылар форма үчүн акча чогултпаган мугалимдер эмгек өргүүсүнө чыкпай тургандыгын билдиришкенин ырастады. «Ар бир класс жетекчи өз классынын окуучуларынан акча чогултушу керек. Мурдагы күнү окуучулардын биринин үйүнө баргам, анын апасы «бизден дагы канча акча сурайсыңар, кайырчылар?» деди. Биз балдардын ата-энелери үчүн жаман көрүнүп бүттүк», – деди ал.
Мугалимдер формага, мектептин ремонтуна жана Элдик демократиялык партиянын мүчөлүк акысына деп акча чогулта тургандыктарын айтышууда.
Бирок министрликтин жооптуу кызматкерлери бирдиктүү мектеп формасына акча чогултуу көрсөтмө эмес, сунуш болгонун билдиришүүдө. Айтымдарында, анын негизинде мектеп жетекчилери окуучулар үчүн бирдиктүү форма тигүү боюнча жергиликтүү тигүүчүлөр менен өз учурунда макулдашуусу керек болот.
Министрликтин өкүлдөрү мындай чечимдин башкы себеби — жергиликтүү өндүрүштү колдоо жана өлкөнүн ички базарын коргоо экенин билдирип, окуучулардын кийимдери стандарттуу, бышык жана ыңгайлуу болушу керектигин белгилешти.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ