Бишкек шаарынын он тогуз жаштагы тургуну Камила Дүйшөбаеванын өлүмүнө байланыштуу козголгон кылмыш ишине үч жылдан ашты. Бул аралыкта шектүүлөрдүн аты аталып келген менен чара көрүлбөй, «карга карганын көзүн чокубайт» деген мамиле өкүм сүрдү. Бирок кан коё бербейт демекчи, кеч болсо да муз ордунан жылды. Камиланын өлүмүнө шектүү катары Калыбек Саляновго издөө жарыяланды. Иликтөө жүрүшүндө Калыбек Салянов 2014-жылдын мартынын ортосунда сауна жетекчиси А.Н. менен бирге видеокамералардагы жазууларды өчүргөнү аныкталганы, муну менен алар кылмыш ишти калыс жана толук иликтөөгө жолтоо болгону айтылган. 29-июнда бул иш боюнча 318-берененин биринчи бөлүгүнө ылайык (тергөөгө каршылык көрсөтүү) иш козголуп, ал Кыргызстандан чыгып кетти деген маалыматтарга байланыштуу издөө салынган. Саляновду камакка алуу тууралуу баш коргоо чарасы аныкталган. Убагында карындашы Аида Салянова башкы прокурор болуп турганда бул иш күч менен басылып, «кимди-ким көрдү, Быржыбайды там басты» кылуу аракети катуу жүрдү. Кийинки жылдары Аида айымдын өзүнүн башына кара булут айланып, юстиция министри болуп турганда Максимдин досу Алексей Елисеевдин адвокаттык лицензиясын узартып бергени боюнча сотто сурак берип жатканына байланыштуу, агасы Калыбекке көмөк кылууга шаасы жетпей калды окшойт. Мындан улам, мойнуна сыйыртмак ыргытылчу күн жакындап калганын туйган Калыбек Салянов фамилиясын Элтуйбасов деп өзгөртүп, өлкөдөн чыгып кеткен. Сыягы Элтуйбасов болсом эле эл билбей, туйбай калат деген го кургур…
Булак: “Фабула”
КОММЕНТАРИЙ КАЛТЫРУУ