Өзбекстандын Мусулмандар дин иштери боюнча башкармалыгы беш миңден ашуун имам менен сүйлөшүүлөрдү өткөрүп, алардын билимдерин текшерди. Маалыматтарга караганда, диний билимдери төмөн имамдарга жана алардын орун басарларына эч кандай чара көрүлбөйт.
Башкармалык билдиргендей, маектешүүнү Ташкенттин белгилүү имамдары жүргүзүштү. “Учурда өлкөдө ири илимий борборлор ачылууда. Мындан улам биз кайсы имамдарды бул борборлорго жөнөтүүгө болорун билгибиз келди”,-деди Мусулмандар дин иштери боюнча башкармалыгынын өкүлү Абдуманнап Усманов.
Анын айтымында, билими төмөн имамдар кийинчерээк иштен айдалышы ыктымал, бирок азырынча аларга карата чара көрүлбөйт. Маектешүүнүн жыйынтыктары 20 күндөн кийин белгилүү болот.
Ферганалык имамдардын биринин айтымында, маектешүүгө катышкандардын көбүнүн билим дэңгээли төмөн, материалдык абалдары начар.
– Алардын айлык акысы 1-1.5 милион сумду (120-180 АКШ доллары) түзөт жана анын теңин эле салыкка төлөшөт. Көпчүлүгү маяна албай Аллах үчүн иштешет. Мечитке намазга жыгылуу үчүн гана барышат, китеп окушпайт,-деди ал.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ