Бул тууралуу Кыргызстандагы Жогорку Нарын ГЭСтер каскадын, ага кошуп он чакан ГЭСти куруу боюнча тендерди утуп алган чехиялык “Лигласс Трейдинг” компаниясынын ээси Михаэл Смелик бүгүн Бишкектеги маалымат жыйынында билдирди.
Анын айтымында, чехиялык компания долбоорду ишке ашырып, аягына чыгарууга даяр. Иш токтогон жок, инженерлер иштеп жатат. Смелик долбоордун ишке ашуусунан күмөн санаган пикирлерин жарыялаган Эдил Байсалов, Феликс Кулов, Темир Сариев айткан маалыматтарды төгүндөдү:
– Быйыл 11-июлда Кыргыз өкмөтү менен келишимге кол коюлгандан бери бизди каралоо аракеттери башталды. Байсалов чех компаниясы гарантиялык төлөмдү төлөгөн жок деп чыкты. Бирок биз аны төлөгөнбүз. Тендер ачык жана эл аралык стандарттарга ылайык өткөн. Эч кандай мыйзам бузуу болгон эмес, – деген Смелик өз дарегине жана компаниясына карата айтылган маалыматтарды четке какты.
Быйыл июлда чехиялык “Лигласс Трейдинг” компаниясы Жогорку Нарын ГЭСтер каскадын жана он чакан ГЭСти куруу боюнча сынактан утуп алган. Келишимге Бишкекте кыргыз өкмөтү менен аталган компания өкүлдөрү президент Алмазбек Атамбаевдин катышуусунда кол коюшкан. Кийинчерээк чехиялык басылмалар ал ишкананын ишмердигинен шек санаган макалаларды жазышкан. Кыргыз өкмөтү аталган компания келишимди аткарарына ишеним арткан билдирүүлөрдү таратып келет.
Премьер-министр Сапар Исаков 25-августта парламентте сүйлөп жатып “эгерде чехиялык компания менен келишим ишке ашпай калса, Кыргызстан зыян тартпайт, бирок андан чыгат” деп айткан.
2012-жылы Кыргызстан жана Орусия Камбар-Ата-1 жана Жогорку Нарын ГЭСтер каскадын куруу боюнча макулдашууга кол койгон эле. Ага ылайык, Орусиянын “РусГидро” компаниясы аталган эки энергетикалык объектти курмак. Бирок бул жаатта иш үзгүлтүккө учурагандыктан, 2015-жылы Кыргызстандын демилгеси менен макулдашуу денонсацияланган. Буга байланыштуу Кыргызстан Орусияга 37 миллион доллар бересе болуп калган.
Сентябрдын башында Орусиянын “РусГидро” компаниясы курулушка сарпталды делген 37 миллион долларды Кыргызстандан өндүрүп алуу үчүн эл аралык арбитражга кайрылууну көздөп жатканын жарыялаган.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ