2017-жылдын 16-сентябрында Кара-Кулжа райондук ички иштер бөлүмүнүн тергөө бөлүмү тарабынан Кыргыз Республикасынын кылмыш жаза кодексинин 165-беренеси (мал уурдоо) боюнча Ылаай-Талаа айылынын 39 жаштагы Б.А. менен П.И. аттуу тургундарынын жазган арыздары боюнча кылмыш иштерин козгогон. Бул туурасында Ош ОИИБнин Басма сөз кызматы билдирет.
Себеби, 2017-жылдын 31-август түнү үйүнүн жанында байланып турган малдарын белгисиз адамдар уурдап кетишкен. Келтирилген чыгым 17 000 сомду түзгөн.
Кара-Кулжа райондук ички иштер бөлүмүнүн кызматкерлери тарабынан жүргүзүлгөн ыкчам-иликтөө иш-чараларынын натыйжасында кылмышка шектүү катары Кара-Кулжа районунун 22 жаштагы З.у. М. аттуу тургуну кармалган.
Ошондой эле, Ноокат райондук ички иштер бөлүмүнө жергиликтүү тургундар арыз менен кайрылышкан. Себеби 2017-жылдын февраль, март, май айларында үйүнүн короолорунда байланып турган малдарын белгисиз адамдар уурдап кетишкен. Арыздануучуларга келтирилген чыгымдын жалпы суммасы 328 000 сомду түзгөн.
Милиция кызматкерлери тарабынан көрүлгөн иликтөө иштеринин негизинде жогорудагы кылмыш иштерине шектүү катары Өзгөн районунун 22 жаштагы М.Ж., Кара-Суу районунун 29 жаштагы Ж. О., Ноокат районунун 21 жаштагы К.А., 18 жаштагы У. Ф., 23 жаштагы Ж.З., Араван районунун 22 жаштагы О.А., 30 жаштагы А.А., 32 жаштагы М.Д. аттуу тургундары кармалышкан.
Ноокат райондук ИИБнин тергөө бөлүмү тарабынан Кыргыз Республикасынын кылмыш-жаза кодексинин 165-беренеси (Мал уурдоо) боюнча кылмыш иштери козголгон. Кармалган жарандар убактылуу кармоочу жайга киргизилип, тергөө амалдары жүрүүдө.
Ал эми, Кара-Суу районунун Суу-Тосмо айылынын тургундары жергиликтүү милиция бөлүмүнө арыздар менен кайрылышкан. Себеби 2016-жылдын сентябрь айында Ата-Мерек жайлоосунан уйларын белгисиз адамдар уурдап кетишкен. Жабырлануучуларга 250.000 сомдук материалдык зыян келтирилген. Кыргыз Республикасынын кылмыш –жаза кодексинин 165-беренесинин (мал уурулук) негизинде кылмыш иштери козголгон.
Милиция кызматкерлери жогорудагы кылмыштарга шектүү катары 29 жаштагы П.А. менен 19 жаштагы Н.К. аттуу Ош шаарынын тургундарын кармашкан. Учурда иликтөө иштери жүрүп жатат.
КОММЕНТАРИЙ КАЛТЫРУУ