Парламент кыргыз-өзбек чек арасы боюнча келишимди ратификациялоо боюнча мыйзам долбоорун үч окууда кабыл алды.
Жогорку Кеңештин маалымат кызматы кабарлагандай, документти жыйынга келген 97 депутаттын баары тең колдоду. Келишимди талкуулоо жабык эшик артында өттү.
Документ парламент тарабынан ратификациялангандан кийин Алмазбек Атамбаевдин Ташкенттеги сапары учурунда Кыргызстан жана Өзбекстан президенттери тарабынан кол коюлат. Сапар 5-октябрга белгиленген.
Кыргыз-өзбек чек арасы боюнча өткөөл келишимге 5-сентябрда Өзбекстандын президенти Шавкат Мирзиёевдин Бишкекке сапарында кол коюлган. Өкмөттүн маалыматына караганда, аталган келишимде Кыргызстан менен Өзбекстандын 1378 чакырым чек арасынын 1170и же 85 пайызы такталган. Калган 208 чакырым же 15 пайызы жыл соңуна чейин макулдашылары айтылууда. Буга чейин такталбаган чек аранын айынан эки элдин ортосунда чыр-чатактар көп катталып, айрым учурларда кан төгүлгөн.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ