Дүйнөлүк банк Өзбекстандагы экономикалык жана социалдык реформаларды колдоо боюнча алдыңкы өнөктөш болууга даяр.
Дүйнөлүк банктын башчысы Жим Ёнг Кимдин айтымында, өткөн жумада 450 миллион долларлык үч инвестициялык долбоорго кол коюлуп, ал Өзбекстандын энергетика, ирригация жана мал чарба тармактарына инвестицияларды тартуусуна мүмкүндүк берет. Бул тууралуу Дүйнөлүк банк тобунун президенти Жим Ёнг Кимдин Өзбекстан президенти Шавкат Мирзиёевге жолдогон катында жазылган.
«Мен техникалык жана каржы жагынан көмөктөшүү боюнча сиздин билдирмеңизди кабыл алып, кесиптештериме аны даярдоону тездетүүнү тапшырдым. Сиздин реформалар боюнча программаңызга негизделген өлкөнүн керектөөлөрүн эске алып, каржылоону тездетүүгө жана түзүмдүк реформаларды иштеп чыгууга, социалдык жана базалык инфраструктурага жана айыл чарба тармагын реформалоого техникалык жактан көмөк көрсөтүүгө даярбыз», – деп айтылат Дүйнөлүк банктын катында.
Жакынкы убакта Өзбекстанга Дүйнөлүк банктын башкы аткаруучу директору Кристалина Георгиева менен аймактык вице-президенти Сирил Мюллер барат. Жергиликтүү ММКлар билдиришкендей, алар Шавкат Мирзиёев менен жолугуп, өз ара кызматташуунун перспективаларын талкуулашат.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ