Казакстанда адам сатуу шеги менен 36 жаштагы Караганда шаарынын тургунун кармалды. Маалыматтарга караганда, ал апрелден бери өзбекстандык 18 жаранды мыйзамсыз кармап турган.
Уюшкан кылмыштуулук менен күрөшүү башкармалыгы өзбекстандык 18 жаран апрелден бери жеке ишкердин колунда мыйзамсыз эмгектенип жүрүшкөнүн маалымдады. Кылмышка шектүү чет өлкөлүк жумушчуларды алдап, коркутуп тегирменде иштеткен. Кылмышка шектүү жабырлануучулардын документтерин алып коюп, маяналарын төлөп берген эмес.
Бул факт боюнча “Адам сатуу” беренеси менен сотко чейинки териштирүү иштери башталды. Эгер шектүү күнөөлүү деп табылса, 5 жылдан 7 жылга чейин эркинен ажыратылып, мүлкү мамлекеттин карамагына өтүшү ыктымал. Полиция кызматкерлери Өзбекстан жарандары миграциялык мыйзамдарды бузушканы үчүн административдик жоопкерчиликке тартылбай турушканын, себеби алар адам соодалоонун курмандыктары катары табылганын билдиришти.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ